ICC T20 Rankings: विराट, राहुलची घसरण; बाबर आझमची जागा भक्कम

ICC T20 Rankings: भारताचा कर्णधार विराट कोहली याने पाकिस्तान विरूद्धच्या सामन्यात झुंजार अर्धशतकी खेळी केली. तरीही ICC ने जारी केलेल्या टी२० क्रमवारीत त्याची एका स्थानाने घसरण झाली असून तो पाचव्या स्थानी विराजमान झाला आहे. भारताचा सलामीवीर केएल राहुल याने पाकिस्तानविरूद्धच्या सामन्यात फारशी चांगली कामगिरी न केल्यामुळे त्यालाही फटका बसला आहे. टी२० क्रमवारीत त्याची दोन स्थानांनी घसरण झाली असून तो आठव्या स्थानी पोहोचला आहे. विराट कोहलीने ४९ चेंडूत ५७ धावांची खेळी केल्याने त्याचे सध्या ७२५ रेटिंग पाँइंट्स आहेत. तर लोकेश राहुलचे सध्या ६८४ रेटिंग पाँइंट्स आहेत.

भारतीय गोलंदाजांची पिसं काढणारा पाकिस्तानचा सलामीवीर मोहम्मद रिझवान याला क्रमवारीत बढती मिळाली आहे. तीन स्थानांची बढती घेत तो चौथ्या स्थानी विराजमान झाला आहे. दक्षिण आफ्रिकेचा एडन मार्क्रम याने ऑस्ट्रेलिया आणि विंडिजविरूद्ध अनुक्रमे ४० आणि ५१ धावांची खेळी केल्याने त्याने आपल्या कारकिर्दीतील सर्वोच्च स्थान मिळवले आहे. त्याने आठ स्थानांची बढती घेत थेट तिसऱ्या स्थानी झेप घेतली आहेत. टी२० क्रमावारीत अव्वलस्थानी इंग्लंडचा डेव्हिड मलान ८३१ रेटिंग पाँइंट्ससह विराजमान आहे. तर पाक कर्णधार बाबर आझम दुसऱ्या स्थानी असून त्याचे ८२० रेटिंग पॉइंट्स आहेत.