गंभीर दुखापतीनंतर शेवटपर्यंत विकेटमागे थांबण्याचं धाडस!

WTC Final: वर्ल्ड टेस्ट चॅम्पियनशिपच्या फायनलमध्ये (World Test Championship) न्यूझीलंडचा विकेट किपर बॅट्समन बीजे वॉटलिंग (BJ Watling) कारकिर्दीतील अखेरचा सामना खेळण्यासाठी मैदानात उतरला होता. राखीव दिवसाच्या खेळाला सुरुवात झाल्यानंतर कर्णधार केन विल्यमसनने थ्रो केलेल्या चेंडूमुळे वॉटलिंगच्या बोटाला लागला. गंभीर दुखापतीनंतरही तो देशासाठी शेवटपर्यंत खेळताना पाहायला मिळाले. बोटाला दुखापत झाल्यानंतर फिजिओ मैदानात आले. यावेळी उजव्या हाताचे बोटाटे हाड सरकल्याचे निदान झाले. ज्यावेळी संघाकडून टिम साउदी, ट्रेंट बोल्ट, जेमिन्सन आणि वॅगनर यांचा भेदक मारा सुरु होता त्यावेळी वेदना बाजूला ठेवून विकेटमागे उभारण्याचे धाडस दाखवले. त्याने ही जबादारी ज्या पद्धतीने पेलली ते चक्रावून टाकणारे आहे.

कारकिर्दीतील शेवटचा सामना खेळत असलेल्या वॉटलिंगने दुखापतीनंतरही उपचार घेऊन शेवटपर्यंत खेळण्याला प्राधान्य दिले. वेदना सहन करत त्यांने संघाच्या विजयात मोलाचा वाटा उचलला. रविंद्र जडेजाला बाद करण्याच्या नादात त्याला दुखापत झाली होती. अखेरचा सामना असल्यामुळे बोटाला पट्टी बांधून त्याने शेवटपर्यंत खेळण्याचा निर्णय घेतला. आपला हा निर्णय योग्य असल्याचेही त्याने या सामन्यात दाखवून दिले. वॅगनरच्या शॉर्ट चेंडूवर त्याने रविंद्र जेडेजाचा झेल घेतल्याचे पाहायला मिळाले. सोशल मीडियावर त्याच्या स्पिरिटचे कौतुक होत आहे.

सामन्याला सुरुवात होण्यापूर्वी विराट कोहलीने फेअरवेल सामन्यात वॉटलिंगसोबत हस्तांदोलन करत त्याला पुढील वाटचालीसाठी शुभेच्छा दिल्याचेही पाहायला मिळाले. आयसीसीने आपल्या अधिकृत ट्विटर अकाउंटवरुन विराट कोहली आणि वॉटलिंग यांच्यातील तो अवस्मरणीय क्षण शेअर केला आहे.

दक्षिण आफ्रिकेतील डरबन येथे जन्मलेल्या बीजे वॉलिंगने नोव्हेंबर 2009 मध्ये टी-20 मालिकेतून न्यूझीलंडकडून पदार्पण केले. वॉटलिंगने कसोटी क्रिकेटमध्ये 8 शतक आणि 19 अर्धशतके झळकावली आहेत. न्यूझीलंडकडून विकेट किपर बॅट्समनच्या रुपात सर्वाधिक धावा करण्याचा विक्रम हा बीजे वॉटलिंगच्या नावे आहे. मेगा फायनल खेळण्यासाठी मैदानात उतरण्यापूर्वीच त्याने क्रिकेटच्या सर्व प्रकारातून निवृत्तीची घोषणा केली होती. न्यूझीलंडच्या संघाने पहिली वहिली टेस्ट चॅम्पियनशिप ट्रॉफी जिंकत आपल्या सहकाऱ्याला मेगा फेअरवेलची संधी साधली.