रेकॉर्ड ब्रेक 1000 वी वनडे! टीम इंडियाचा 519 वा विजय

India vs West Indies, 1st ODI : युजी आणि वॉशिंग्टनच्या खेळीनंतर रोहित शर्माच्या सुंदर खेळीच्या जोरावर भारतीय संघाने पाहुण्या वेस्ट इंडीजला पराभूत केले. भारतीय संघाने 1000 व्या वनडे सामन्यात 519 विजय नोंदवला. या विजयासह टीम इंडियाने तीन सामन्यांच्या मालिकेत 1-0 अशी आघाडी घेतली आहे. अहमदाबादच्या नरेंद्र मोदी स्टेडियमवर रंगलेल्या सामन्यात रोहित शर्माने टॉस जिंकून पहिल्यांदा गोलंदाजी करण्याचा निर्णय घेतला होता. युजी आणि वॉशिंग्टनच्या फिरकीसमोर वेस्ट इंडीजच्या संघाने गुडघे टेकले. जेसन होल्डरच्या अर्धशतकाच्या जोरावर कॅरेबियन संघाने कशा बशा 176 धावा केल्या होत्या. या धावांचा पाठलाग करताना भारतीय संघाने दमदार सुरुवात केली. रोहित शर्माने युवा सलामीवीर ईशान किशनच्या साथीने भारतीय संघाच्या डावाला सुरुवात केली.

भारतीय सलामी जोडीनं पहिल्या विकेटसाठी 84 धावांची भागीदारी करत भारतीय संघाच्या विजयाचा पाया रचला. रोहित शर्मा 60 धावा करुन बाद झाला. त्याच्यानंतर मैदानात उतरलेल्या विराट कोहली चार चेंडूत 2 चौकाराच्या मदतीने 8 धावा करुन बाद झाला. या दोघांनाही अल्झारी जोसेफनं तंबूचा रस्ता दाखवला. हसैन याने ईशान किशनच्या रुपात टीम इंडियाला तिसरा धक्का दिला. त्याने 36 चेंडूत 28 धावांची खेळी केली. आपल्या या खेळीत त्याने 2 चौकार आणि एक षटकार खेचला. जोसेफन पंतला रन आउट केले. त्याने 11 धावांची भर घातली. सुर्यकुमार यादव 34 (36) आणि दीपक हुड्डा 26(32) धावांची नाबाद खेळी करत संघाच्या विजयावर शिक्कामोर्तब केले.

भारतीय संघाने यासामन्यासह 1000 वनडे सामने खेळण्याचा विक्रम रचला. आतापर्यंतचा भारताचा हा 519 वा विजय ठरला. 431 सामन्यात भारतीय संघाला पराभवाचा सामना करावा लागला असून 41 सामन्यांचा अनिर्णित राहिले आहेत. 2002 मध्ये भारतीय संघाने 500 वा वनडे सामना खेळला होता. आंतरराष्ट्रीय क्रिकेटमध्ये केवळ तीन संघांनी 900 हून अधिक वनडे सामने खेळले आहेत. यात भारत 1000, ऑस्ट्रेलिया 958 आणि पाकिस्तान 936 सामन्यांचा समावेश आहे.