Eng vs Ind : सगळे शेर ढेर झाले असताना पंत-पांड्या इंग्रजांना भिडले

IND vs ENG ODI : ऋषभ पंतच्या शतकाच्या जोरावर भारताने तीन सामन्यांच्या वनडे मालिकेतील अंतिम आणि निर्णायक सामन्यात इंग्लंडचा 5 गडी राखून पराभव केला. ओल्ड ट्रॅफर्ड मैदानावर खेळल्या गेलेल्या सामन्यातील विजयासह भारताने एकदिवसीय मालिका 2-1 ने जिंकली. प्रथम फलंदाजी करताना इंग्लंडचा संघ 45.5 षटकांत सर्वबाद 259 धावांवर ऑल आउट झाला. प्रत्युत्तरात भारताने 42.1 षटकांत 5 बाद 261 धावा करून सामना हा जिंकला.

भारताची सुरुवात चांगली झाली नाही. रिसे टॉप्लीने पुन्हा एकदा टीम इंडियाला धक्के दिले. शिखर धवन एक धाव काढून बाद झाला. रोहित शर्मा 17 तर विराट कोहली 17 या आघाडीच्या फलंदाजांना ३८ धावांवर रिसे टॉप्लीने बाद केले. सूर्यकुमार यादवने 16 धावा केल्या. त्यानंतर रिषभ व हार्दिक पांड्या सहजतेने धावा करताना दिसल्याने भारतीय चाहत्यांना आशेचा किरण दिसला. हार्दिक पांड्या 55 चेंडूत 71 धावा काढून बाद झाला. हार्दिकने आपल्या खेळीत 10 चौकार मारले. त्याने ऋषभ पंतसोबत पाचव्या विकेटसाठी 115 चेंडूत 133 धावांची भागीदारी केली आणि भारताला कठीण परिस्थितीतून बाहेर काढले.

टीम इंडियासमोर इंग्लंडची टॉप ऑर्डर पूर्णपणे अपयशी ठरत आहे. झटपट धावा काढण्याच्या नादात इंग्लंडच्या फलंदाजांनी आपल्या विकेट्स गमावल्या. भारताने मालिकेत इंग्लंडला सलग तिसऱ्यांदा ऑलआऊट केले. इंग्लंडकडून कर्णधार जोस बटलरने 60 धावा केल्या. बटलरशिवाय जेसन रॉयने 41, मोईन अलीने 34, क्रेग ओव्हरटनने 32 आणि बेन स्टोक्स आणि लियाम लिव्हिंगस्टोनने 27-27 धावांचे योगदान दिले. भारताकडून हार्दिक पांड्याने शानदार गोलंदाजी करत 7 षटकात 24 धावा देत 4 बळी घेतले. हार्दिकच्या वनडे कारकिर्दीतील ही सर्वोत्तम गोलंदाजी कामगिरी आहे. त्यांच्याशिवाय युझवेंद्र चहलने तीन आणि मोहम्मद सिराजने दोन तर रवींद्र जडेजाने एक विकेट घेतली.