IND vs ENG : किंग कोहलीनं केली पुजाराची पाठराखण

इंग्लंड विरुद्धच्या कसोटी मालिकेपूर्वी भारतीय संघाचा कर्णधार विराट कोहलीने चेतेश्वर पुजाराची पाठराखण केलीये. खेळातील उणीवा भरुन काढण्याची जबाबदारी ही त्या-त्या खेळाडूची असते. त्यामुळे पुजारावर टीका करणाऱ्यांनी त्याच्या खेळाच्या शैलीचा निर्णय त्याच्यावरच सोडायला हवा, असे विराटने म्हटले आहे. सध्याच्या घडीला भारतीय संघात विराट कोहलीनंतर सर्वाधिक धावा करणाऱ्या खेळाडूंमध्ये पुजाराचे नाव दुसऱ्या क्रमांकावर आहे. तरीही त्याच्या संथ खेळीवर नेहमीच टीका होताना दिसते. पुजाराने 86 सामन्यात 6267 धावा केल्या आहेत. मॅचवेळी पुजारा अधिकच बचावात्मक भूमिका घेतो, त्यामुळे संघाला पराभवाला सामोरे जावे लागते, असे आरोपही पुजारावर झाले आहेत. त्याच्या बचावात्मक खेळ शैलीमुळे समोरच्या फलंदाजावरील दबाव वाढतो, असेही अनेकांचे मत आहे.

किंग कोहलीला मात्र असे अजिबात वाटत नाही. त्याने मध्यफळीतील भरवशाच्या फलंदाजाची पाठराखण केलीये. कोहली म्हणाला की, मागील काही काळापासून पुजाराच्या संयमी खेळीबाबत अनेक चर्चा रंगत आहेत. तो अनुभवी आणि प्रतिभावंत खेळाडू आहे. उणीवा भरुन काढण्यासाठी आपण त्याला मोकळीक दिली पाहिजे.

इंग्लंड विरुद्धच्या पाच सामन्यांच्या मालिकेपूर्वी भारतीय संघाचा कर्णधार विराट कोहली याने प्रसारमाध्यमांशी संवाद साधला. यावेळी तो म्हणाला की, या स्तरावर खेळत असताना प्रत्येक खेळाडूला आपल्या जबाबदारीची जाणीव असते. संघातील सर्वच याबाबत जागरुकही असतात. संघासाठी कोणती गोष्ट उपयोगी आहे आणि कोणती गोष्ट अनावश्यक आहे हे माझ्यासह इतर खेळाडूंना समजते. पुजारावर टीकेचा काहीही परिणाम होत नाही, असेही विराट यावेळी म्हणाला.

इंग्लंड विरुद्धच्या सामन्यात प्लेइंग इलेव्हनसंदर्भात विराट कोहलीने अधिक बोलणे टाळले. मात्र यावेळी त्याने शार्दुल ठाकूरवर कौतुकाचा वर्षाव केल्याचे पाहायला मिळाले. शार्दुल ठाकूर सर्व प्रकारात खेळण्यासाठी फिट असल्याचे विराटने म्हटले आहे. शार्दुल ठाकूर हा चांगला आणि उपयुक्त अष्टपैलू होऊ शकतो, असा विश्वासही कोहलीने व्यक्त केलाय. पहिल्या कसोटीसाठी शार्दुलला प्लेइंग इल्वेहनमध्ये संधी मिळणार का? असा प्रश्न क्रिकेट चाहत्यांना पडू शकतो.