Indian Boxer : शिव, अमित, सचिन उपांत्यपूर्व फेरीत

अम्मान जॉर्डन : भारतीय बॉक्सर्सनी शुक्रवारचा दिवस गाजवला. पाच वेळा आशियाई स्पर्धेत पदक जिंकणारा शिव थापा, सचिन व अमित कुमार या भारतीय खेळाडूंनी आशियाई एलिट बॉक्सिंग अजिंक्यपद स्पर्धेतील पुरुष विभागाच्या आपापल्या गटात उपांत्यपूर्व फेरीत प्रवेश केला.

थापा हा ६३.५ किलो वजनी गटात सहभागी झाला. त्याच्यासमोर बायमबातसोग्त तुगुलदूर या मंगोलियाच्या खेळाडूचे आव्हान होते. दोन खेळाडूंमधील ही लढत अटीतटीची झाली, पण थापाने अनुभव व जलद हालचालींच्या जोरावर प्रतिस्पर्ध्यावर ३-२ असा विजय साकारला.

अमित कुमार याला ६७ किलो वजनी गटात चीन तैपईच्या झेंग ह्युयांग याच्याशी दोन हात करावे लागले. या लढतीत भारतीय खेळाडूंचाच दबदबा दिसून आला. अमितकडे जबरदस्त तांत्रिक क्षमता असून प्रचंड आत्मविश्‍वासासह तो ही लढत खेळला. त्याने चीन तैपईच्या खेळाडूला ५-० असे सहज पराभूत केले. सचिन ७१ किलो वजनी गटात सहभागी झाला. त्याला थायलंडच्या पीरापत यीसुंगनोएन याचा सामना करावा लागला. पहिल्या फेरीत सचिनला निराशेला सामोरे जावे लागले, पण पुढील दोन्ही फेरींमध्ये त्याने झोकात पुनरागमन केले आणि ५-० असा विजय मिळवला.