भारतासाठी मोठी बातमी! पंच नितीन मेनन ICC एलिट पॅनलमध्ये कायम

क्रिकेट विश्वातून भारतासाठी एक आनंदाची बातमी येत आहे. आंतरराष्ट्रीय क्रिकेट परिषदेने (ICC) भारताच्या नितीन मेननला आयसीसी एलिट पॅनलमध्ये कायम ठेवले आहे. या महिन्याच्या अखेरीस श्रीलंका आणि ऑस्ट्रेलिया यांच्यातील कसोटी सामन्यात तो प्रथमच न्यूट्रल पंच म्हणून काम पाहणार आहे. भारतीय क्रिकेट नियामक मंडळाच्या (BCCI) एका अधिकाऱ्याने सांगितले की, आयसीसीने एलिट पॅनेलमधील मेनन यांचा कार्यकाळ एका वर्षासाठी वाढवला आहे.(indian umpires nitin menon retains spot icc elite panel)

इंदूरचे 38 वर्षीय पंच मेनन हे एलिट पॅनेलच्या 11 सदस्यांपैकी एकमेव भारतीय आहेत. आयसीसीने अलीकडेच मेनन यांचा कार्यकाळ एक वर्षाने वाढवला आहे, असे अधिकाऱ्याने सांगितले. गेली तीन-चार वर्षे ते आमचे मुख्य पंच आहेत. या महिन्याच्या अखेरीस मेनन न्यूट्रल पंच म्हणून पदार्पण करणार आहे.

कोविड-19 महामारीच्या काळात नितीन मेनन यांना एलिट पॅनेलमध्ये समावेश करण्यात आले होते. एस वेंकटराघवन आणि एस रवी यांच्यानंतर एलिट पॅनेलमध्ये समाविष्ट होणारे नितीन मेनन तिसरे भारतीय ठरले आहे. मेननही मात्र भारतातच आंतरराष्ट्रीय सामन्यांमध्ये काम करू शकले, कारण प्रवासी निर्बंधांमुळे आयसीसीने स्थानिक पंचांना घरच्या मालिकेतील सामन्यांमध्ये काम करण्याची परवानगी दिली होती.