'मी पुन्हा येईन...'; IPL सुरू होण्याआधी स्टार क्रिकेटपटूची पोस्ट

IPL 2021 चा दुसरा टप्पा १९ सप्टेंबरपासून सुरू होत आहे

इंडियन प्रीमियर लीग म्हणजेच IPL 2021 चा दुसरा टप्पा १९ सप्टेंबरपासून सुरू होणार आहे. मुंबई विरूद्ध चेन्नई या सामन्याने ही स्पर्धा सुरू होईल. कोरोनाचा धोका असतानाही IPL 2021 चे आयोजन भारतात करण्यात आले. जवळपास अर्धी स्पर्धा झाली आणि कोरोनाच्या प्रादुर्भावाचा फटका IPL ला बसला. या अर्ध्या हंगामात चर्चा झाली ती एका फोटोची... डेव्हिड वॉर्नरचा एक फोटो त्यावेळी खूप व्हायरल झाला. त्यानंतर वॉर्नर संघातून खेळणार की नाही यावर चर्चा रंगली होती. त्याचे उत्तर थेट वॉर्नरनेच दिले.

IPL 2021 पहिल्या टप्प्यात हैदराबादच्या संघाला चांगली कामगिरी करणं शक्य होत नव्हतं. त्यामुळे डेव्हिड वॉर्नरला कर्णधारपदावरून दूर करण्यात आले. त्यासोबतच त्याला संघातूनही वगळण्यात आले. त्यावेळी सीमारेषेबाहेर डोकं गुडघ्याला टेकवून बसलेला वॉर्नर सगळ्यांना आठवत असेलच. त्यानंतर वॉर्नर दुसऱ्या टप्प्यासाठी येणार की नाही, याबद्दल चर्चा सुरू होती. त्याचे उत्तर वॉर्नरने इन्स्टाग्राम पोस्टवरून दिले. वॉर्नरने आपला हैदराबादच्या जर्सीमधील फोटो पोस्ट केला आणि मी परत येईन असा मेसेज दिला.

दरम्यान, IPL 2021च्या दुसऱ्या टप्प्याला सप्टेंबरमध्ये सुरूवात होणार असली तरी त्याची तयारी आतापासूनच सुरू करण्यात आली आहे. काही खेळाडू नुकतेच युएईमध्ये दाखल झाले आहेत. तर काही खेळाडू आपापल्या संघासोबत वेगवेगळ्या क्रिकेट मालिका खेळून लवकरच युएईमध्ये दाखल होणार आहेत. सध्या IPL 2021च्या पहिल्या टप्प्यात अंदाजे सर्व संघांचे किमान ७ सामने खेळून झाले आहेत. त्यात दिल्ली अव्वल स्थानी तर चेन्नई दुसऱ्या स्थानी आहे.