देजावू! स्मिथच्या जागी आलास ना? घे मग आता थेट हेल्मेटवर बाँउन्सर!

लंडन : इंग्लंडचा तेजतर्रार वेगवान गोलंदाज जोफ्रा आर्चर याने दुसऱ्या ऍशेस कसोटीत ऑस्ट्रेलियाचा धडाकेबाज फॉर्मातील फलंदाज स्टीव स्मिथ याला मोक्‍याच्या क्षणी उसळत्या चेंडूवर जायबंदी केले. यावर तो थांबला नाही तर त्याच्याजागी बदली खेळाडू म्हणून संघात आलेल्या मार्कस लाबुशेन यालाही आर्चरने पहिलाच चेंडू बाँउन्सर टाकला. 

स्मिथ जायबंदी झाल्यावर आयसीसीने सुरु केलेल्या नव्या नियमांनुसार त्याच्या जागी संघात लाबुशेनला संधी देण्यात आली. मात्र, आर्चरने पहिल्याच चेंडू त्याला बाँउन्सर टाकला. हा चेंडू जाऊन थेट त्याच्या हेल्मेटवर आदळला आणि तोही खाली पडला. मात्र, सुदैवाने त्याला कोणतीही इजा झाली नाही. 

चौथ्या दिवशी स्मिथच्या मानेवर चेंडू लागला. त्याआधी त्याचा हातही शेकून निघाला होता. स्मिथला 80 धावांवर 'रिटायर्ड हर्ट' व्हावे लागले, पण नंतर तो थोड्या वेळात मैदानावर परतला. त्याने 92 धावांपर्यंत मजल मारली. ख्रिस वोक्‍सने त्याला पायचीत केले. 

स्मिथ आखूड टप्प्याच्या वेगवान चेंडूंवर अडखळत खेळत असल्याचे हेरताच आर्चरने आणखी टिच्चून मारा केला. मानेवर लागलेल्या चेंडूचा वेग ताशी 92 मैल इतका होता. त्याच्या भेदक हप्त्यात चेंडूंचा सरासरी वेग ताशी 90 मैल होता. अनेक चेंडू ग्लोव्हज्‌ला लागले. त्या चेंडूंचा वेग ताशी 96.1 मैल होता. स्मिथ "रिटायर्ड हर्ट' झाल्यानंतर पीटर सीड्‌ल फलंदाजीला आला. त्याला आर्चरने टाकलेल्या पहिल्याच चेंडूचा वेग ताशी 95 मैल होता. हा चेंडू थाय पॅडवर (मांडीचे पॅड) लागला.