Cricket : क्रिकेट खेळताना दुसरी धाव ठरली अखेरची..; कामुर्लीत तरुणाचा मृत्यू

म्हापसा (Mapusa) : तरुणपणात हृदयविकाराचा झटका येण्याच्या घटना मागच्या काही वर्षात वाढल्या आहेत. कामुर्लीतील (Kamurli Cricket Ground) मैदानावर क्रिकेट खेळताना पांडुरंग विठू खोर्जुवेकर (३९, रा. मळेवाडा-कामुर्ली) या तरुणाचा हृदयविकाराच्या झटक्यानं (Heart Attack) मृत्यू झाला.

पांडुरंग मित्रांसोबत क्रिकेट खेळत होता. तो फलंदाजी करत होता. दुसरी धाव काढतानाच काळानं त्याच्यावर घाला घातला. पांडुरंग हा दुसरी धाव काढत असताना धावपट्टीवरच कोसळला. या प्रकारानंतर त्याला मित्राच्या इनोव्हा कारनं (Innova Car) तीनमाड-सडये येथील रुग्णालयात आणण्यात आलं. पण, तेथील डॉक्टरांनी त्यास मृत घोषित केलं.

सोमवारी गोमेकॉमध्ये उत्तरीय तपासणी केली असता, त्याचा मृत्यू हृदयविकाराच्या झटक्यानं झाल्याचं स्पष्ट झालं. पांडुरंगला रक्तदाब व मधुमेहाचा विकार जडला होता. तो पिळर्ण औद्योगिक वसाहतीमधील एका कंपनीमध्ये नोकरी करत होता. त्याच्या पश्चात पत्नी, दोन मुली, आई, भाऊ असा परिवार आहे. कोलवाळ पोलीस (Kolwal Police) उपनिरीक्षक कुणाल नाईक यांनी पंचनामा केला. ही घटना रविवारी घडली.