विराट-कुंबळेंच्या वादाचे कारण ठरलेल्या चायनामनचा बर्थडे

kuldeep yadav birthday : भारतीय क्रिकेटला महान फिरकी गोलंदाजांचा वारसा लाभला आहे. भारताने क्रिकेट विश्वाला अनेक ऑफ स्पिनर, लेग स्पिनर, लेफ्ट आर्म स्पिनर दिले. मात्र भारताच्या या महान फिरकीच्या इतिहासात चायनामन गोलंदाजाची कमी होती. ती कुलदीप यादवने भरुन काढली. आज भारताच्या पहिल्या चायनामन गोलंदाजाचा कुलदीप यादवचा २७ वा वाढदिवस आहे.

कुलदीप यादवने आंतरराष्ट्रीय क्रिकेटमध्ये दोन हॅट्ट्रिक घेणारा तो पहिला गोलंदाज आहे. एकदिवसीय क्रिकेटमध्ये सर्वात जलद 100 विकेट घेणारा तो जगातील 15 गोलंदाजांपैकी एक आहे. सिडनीच्या मैदानावर त्याने ऑस्ट्रेलियाविरुद्धच्या कसोटीमध्ये पाच विकेट्स घेण्याचा पराक्रमही केला आहे.

कुलदीप यादववरुनच विराट - कुंबळेमध्ये वाद

टीम इंडियाचे प्रशिक्षक अनिल कुंबळे आणि विराट कोहली यांच्यातील वादाची चर्चा खूपदा होते. काही खेळाडूंची कारकिर्द संपवल्याचा आरोप विराट आणि शास्त्रींवर केला जातो. यात कुलदीप यादवच्या नावाचाही समावेश आहे.

ऑस्ट्रेलियन संघ 2017 मध्ये भारत दौऱ्यावर आला होता. पुण्यात खेळल्या गेलेल्या पहिल्या कसोटीत ऑस्ट्रेलियाने भारतीय संघाचा मोठ्या फरकाने पराभव केला. पहिल्या सामन्यातील पराभवानंतर भारतीय संघाने दुसऱ्या कसोटीत दमदार पुनरागमन केले. 4 सामन्यांची ही मालिका 1-1 अशी बरोबरीत राहिली होती.

तिसरी कसोटी रांची येथे खेळवली जाणार होती. या दौऱ्याच्या काही महिन्यांपूर्वीच प्रशिक्षण म्हणून अनिल कुंबळे यांची नियुक्ती करण्यात आली होती. पण हा कसोटी सामना भारतीय संघात वादाचे कारण ठरला. या सामन्यात खेळाडूची निवड कर्णधार विराट कोहली आणि प्रशिक्षक अनिल कुंबळे यांच्यातील वादाचे मूळ ठरले. मालिका 1-1 अशी बरोबरीत असताना रांची कसोटी भारतीय संघासाठी महत्त्वाची होती. या सामन्यात कुलदीपला संधी मिळणार अशी चर्चाही रंगली. पण झाले काही वेगळेच. प्रशिक्षक कुंबळे यांना या कसोटीत चायनामन गोलंदाज कुलदीप यादवला मैदानात उतरवायचे होते. पण कर्णधाराने याला विरोध केला. शेवटी कुलदीपला रांची कसोटीत बाकावच बसावे लागले. याचा फटका टीम इंडियाला बसला. हा सामनाही बरोबरीत सुटला. पण या घटनेमुळे कर्णधार आणि प्रशिक्षक यांच्यातील वाद चव्हाटयावर आला होता.