Rapid and Blitz 2024 : मॅग्नस कार्लसन विजेता! डी. गुकेश अखेरच्या स्थानी

वॉरसॉ (पोलंड) : जागतिक क्रमवारीत पहिल्या स्थानावर असलेल्या मॅग्नस कार्लसन याने सुपरबेट जलद व ब्लिटझ्‌ बुद्धिबळ स्पर्धेत विजेता होण्याचा मान संपादन केला. त्याने एकूण २६ गुणांची कमाई करताना जेतेपदावर मोहर उमटवली. वेई यी याला २५.५ गुणांसह दुसऱ्या स्थानावर समाधान मानावे लागले. जॅन डुडा तिसऱ्या स्थानावर राहिला.

मॅग्नस कार्लसन व वेई यी यांच्यामध्ये अखेरच्या दिवशी अडीच गुणांचा फरक होता. हा फरक भरून काढून अजिंक्यपद मिळवणे कठीण काम होते; पण दिग्गज खेळाडू कार्लसन याने एकूण २६ गुणांची कमाई करताना विजेतेपदाला गवसणी घातली. त्याने वेई यी याच्यावर अर्ध्या गुणाने विजय साकारला. कार्लसन या स्पर्धेत इतर नऊ खेळाडूंवर मात केली हे विशेष.

प्रज्ञानंद चौथ्या स्थानी

भारताच्या तीन खेळाडूंचा या स्पर्धेत सहभाग होता. आर. प्रज्ञानंद याने १९ गुणांसह चौथे स्थान पटकावले. अर्जुन इरिगेसी १८ गुणांसह पाचव्या स्थानावर राहिला; पण आव्हानवीरांच्या बुद्धिबळ स्पर्धेत विजयी ठरलेल्या डी. गुकेशची या स्पर्धेमध्ये घसरण झाली. त्याला १२.५ गुणांसह अखेरच्या दहाव्या स्थानावर समाधान मानावे लागले.

सुपरबेट बुद्धिबळ स्पर्धेतील क्रमवारी

१) मॅग्नस कार्लसन (२६ गुण) २) वेई यी (२५.५ गुण) ३) जॅन डुडा (१९.५) ४) आर. प्रज्ञानंद (१९ गुण) ५) अर्जुन इरिगेसी (१८ गुण) ६) नोदीरबेक अब्दुसत्तोरोव (१७.५ गुण) ७) किरील शेवचेंको (१५ गुण) ८) अनिश गिरी (१४ गुण) ९) विनसेंट केमर (१३ गुण) १०) डी. गुकेश (१२.५ गुण).

प्रज्ञानंद, हम्पी, वैशालीवर भारताची मदार

नॉर्वे बुद्धिबळ ही आंतरराष्ट्रीय स्तरावरील मानाची स्पर्धा म्हणून ओळखली जाते. ही स्पर्धा येत्या २७ मे ते ७ जून या कालावधीत रंगणार आहे. या स्पर्धेमध्ये भारतीय संघाची मदार आर. प्रज्ञानंद, कोनेरु हम्पी व आर. वैशाली या खेळाडूंवर असणार आहे. या स्पर्धेतील पुरुष विभागात प्रज्ञानंदच्या रूपात भारताचा एकमेव खेळाडू सहभागी होणार आहे. या स्पर्धेत मॅग्नस कार्लसन, हिकारु नाकामुरा व सध्याचा जगज्जेता डिंग लिरेन यांचाही सहभाग असणार आहे. त्यामुळे प्रज्ञानंदचा कस लागेल, हे निश्‍चित आहे.