Murali Sreeshankar : मुरली श्रीशंकरच्या गुडघ्यावर डोहामध्ये यशस्वी शस्त्रकिया

नवी दिल्ली : भारताचा लांब उडीतील खेळाडू मुरली श्रीशंकरच्या गुडघ्यावर शस्त्रक्रिया करण्यात आली. या दुखापतीमुळे त्याला जुलै-ऑगस्ट महिन्यात होणाऱ्या पॅरिस ऑलिंपिक स्पर्धेस मुकावे लागणार आहे.

आशिया आणि राष्ट्रकुल स्पर्धेत रौप्यपदक जिंकणाऱ्या श्रीशंकरच्या गुडघ्यावर दोहामध्ये ही शस्त्रक्रिया करण्यात आली. डॉ. ब्रुनो ऑलोरी यांच्या मार्गदर्शनाखाली झालेली ही शस्त्रक्रिया यशस्वी झाली आहे. तुम्हा सर्वांचे आशीर्वाद माझ्यासाठी मोलाचे ठरले, अशी भावना मुरलीने व्यक्त केली. १८ तासानंतर मी चालू शकेन, असेही तो सोशल माध्यमावर व्यक्त होताना म्हणाला आहे.

या महिन्याच्या सुरुवातीला सराव करताना श्रीशंकरचा गुडघा दुखावला होता. बँकॉक जुलै २०२३ मध्ये झालेल्या आशियाई अजिंक्यपद स्पर्धेत रौप्यपदक जिंकून श्रीशंकर पॅरिस ऑलिंपिकसाठी पात्र ठरला होता. ८.२७ मीटर हा ऑलिंपिक पात्रता निकष होता; परंतु श्रीशंकरने ८.३७ मीटर अशी कामगिरी केली होती. गेल्या वर्षी जून महिन्यातील डायमंड लीग स्पर्धेत तो तिसरा आला होता.