Coach Gurpreet Maras: स्वप्न राहिले अपूर्ण, शिष्य करताहेत पूर्ण; माजी बुद्धिबळपटू व प्रशिक्षक गुरप्रीतसिंग घडवितोय भविष्यातील तारे

नरेंद्र चोरे

नागपूर: अफाट गुणवत्ता असूनही ‘तो’ उमेदीच्या काळात बुद्धिबळातील प्रतिष्ठेचा आंतरराष्ट्रीय मास्टर (आयएम) तसेच ग्रॅण्डमास्टर (जीएम) किताब मिळवू शकला नाही. मात्र, त्यानंतर प्रशिक्षक बनून त्याने अनेक ‘आयएम’ व ‘जीएम’ तयार करून आपले अपूर्ण स्वप्न पूर्ण केले. ही प्रेरणादायी कहाणी आहे माजी आंतरराष्ट्रीय बुद्धिबळपटू व प्रशिक्षक गुरप्रीतसिंग मरासची. ३९ वर्षीय गुरप्रितने जवळपास दीड दशकाच्या करिअरमध्ये जिल्हा, विभागीय, राज्य व राष्ट्रीय स्पर्धांमध्ये अनेक विजेतीपदे जिंकली.