Novak Djokovic : क्षणिक रागाची किंमत साडेसहा लाख रुपये..., रॅकेट आपटणे जोकोविचला पडले महाग

Novak Djokovic : नोवाक जोकोविच कितीही थोर आणि विक्रमवीर टेनिसपटू असला तरी रागावर त्याचे नियंत्रण राहत नाही. अनेकदा रॅकेट आपटून तो आपला राग कोर्टवर व्यक्त करत असतो. रविवारी झालेल्या विम्बल्डन अंतिम सामन्यात असाच काही क्षणाचा राग त्याला महागात पडला. त्यासाठी त्याला ६,११७ युरोंचा दंड करण्यात आला. भारतीय रुपयात ही रक्कम ६ लाख ५७ हजार इतकी आहे.

रविवारी विम्बल्डन सेंटर कोर्टवर झालेला जोकोविच आणि अल्काराझ यांच्यातील सामना कमालीचा चुरशीचा झाला. यात अल्काराझने १-६, ७-६, ६-१, ३-६, ६-४ असा पाच सेटमध्ये विजय मिळवत जोकोविचला दोन विक्रमांपासून रोखले. त्यामुळे त्याला रॉजर फेडररच्या आठ विम्बल्डन विजेतेपदाशी बरोबरी साधता आली नाही आणि सर्वाधिक २४ ग्रँड स्लॅम विजेतेदाच्या मार्गारेट कोर्ट यांच्याशी विक्रमाशी बरोबरी साधता आली नाही.

जोकोविचसाठी हा अंतिम सामना जिंकणे सर्वार्थाने महत्त्वाचे होते. सामना संपल्यानंतर त्याने विजेत्या अल्काराझची मुक्तकंठाने स्तूस्ती केली, परंतु एका क्षणी व्यक्त केलेला राग त्याला भलताच महागात पडला.

पाचव्या आणि अंतिम सेटमध्ये हा प्रकार घडला. या सेटमध्ये जो सर्व्हिस भेदणार होता त्याला आघाडी घेण्याची संधी मिळणार होती, परंतु संधी असताना जोकोविच अल्काराझची सर्व्हिस भेदू शकला नाही आणि लगेचच स्वतःची सर्व्हिस राखू शकला नाही. हा राग त्याने रॅकेटवर काढला. त्याने स्वतःची रॅकेट नेट पोलवर जोरात मारली, त्यामुळे पोलला पोक आलेच आणि रॅकेटही तुटली.

चेअर अंपायर फर्ग्युस मर्फी यांनी प्रथम जोकोविचलला नियमाचा भंग केल्याची ताकीद दिली आणि त्यानंतर ६,११७ युरोचा दंड केला. ही रक्कम जोकोविचला उपविजेतेपदासाठी मिळालेल्या १.१७५ दशलक्ष पौंड (सुमारे ११ लाख रुपायांपेक्षा अधिक) रकमेतून कापून घेण्यात आली.

या अंतिम सामन्यात जोकोविचला दोनदा ताकीद देण्यात आली. यातील पहिली ताकीद त्याने वेळेत सर्व्हिस केली नव्हती आणि दुसरी ताकीद रॅकेट आपटल्याबद्दल होती. ब्रेक पॉइंट मी जिंकू शकलो नाही याचा राग मला आला आणि त्यातून ही कृती घडली, अशी कबुली जोकोविचने दिली.

स्पर्धेतूनच झाला होता बाद

रागामुळे चेंडू जोरात मारल्याचा आणखी एक मोठा फटका जोकोविचला बसलेला आहे. २०२० च्या यूएस ओपन स्पर्धेत त्याने रागाने विनाकारण जोरात मारलेला चेंडू लाईनमन जजच्या कंठाला लागला, त्यामुळे जोकोविचला स्पर्धेतून बाद करण्यात आले होते.