Ranji Trophy : पराभव टाळण्यासाठी महाराष्ट्राची झुंज; विदर्भाला डावाने विजयाची आशा

पुणे : महाराष्ट्राचा संघ रणजी क्रिकेट करंडकातील एलिट ‘अ’ गटातील लढतीत पराभव टाळण्यासाठी झुंज देत आहे. महाराष्ट्राला पहिल्या डावात २०८ धावांमध्ये गुंडाळल्यानंतर विदर्भाच्या संघाने पहिल्या डावात ५५२ धावांचा डोंगर उभारला. महाराष्ट्राच्या संघाने दुसऱ्या डावात ३ बाद १८७ धावा केल्या असून अजूनही त्यांचा संघ १५७ धावांनी पिछाडीवर आहे.

विदर्भाचा संघ या लढतीत डावाने विजय मिळवण्यासाठी प्रयत्नांची शिकस्त करील. विदर्भाच्या संघाने रविवारी ६ बाद ४३९ या धावसंख्येवरून पुढे खेळायला सुरुवात केली. प्रदीप दाढे याने करूण नायर याला मोठी खेळी उभारू दिली नाही. त्याने कालच्या (१२८ धावा) धावसंख्येत आणखी एक धावेची भर घातली.

१२९ धावांच्या खेळीत त्याने १८ चौकार मारले. हर्ष दुबे याने ५७ चेंडूंमध्ये ४६ धावांची खेळी केली. विदर्भाने पहिल्या डावात ५५२ धावा फटकावल्या. हितेश वाळुंज याने १२७ धावा देत चार फलंदाज बाद केले. विदर्भाने पहिल्या डावात ३४४ धावांची आघाडी मिळवली.

महाराष्ट्राने दुसऱ्या डावात ३ बाद १८७ धावा केल्या आहेत. मुर्तझा ट्रंकवाला व दिग्विजय पाटील यांनी दमदार अर्धशतके झळकावली. मुर्तझा याने १५ चौकारांचा पाऊस पाडत ८६ धावांची खेळी साकारली. आता दिग्विजय पाटील याने सात चौकारांसह ६१ धावांची खेळी केली आहे. त्याच्यासोबत आशय पालकर १७ धावांवर खेळत आहे.