सचिनभाई बहोत शुक्रिया! रॉस टेलरने हिंदीत ट्वीट करत जिंकली चाहत्यांची मनं

न्यूझीलंडचा अनुभवी फलंदाज रॉस टेलरने सोमवारी (४ एप्रिल) १६ वर्षे खेळल्यानंतर आंतरराष्ट्रीय क्रिकेटमधून निवृत्ती घेतली. त्यानंतर टेलरचे त्याच्या या शानदार कारकिर्दीबद्दल अनेक दिग्गजांनी कौतुक केले. या यादीत भारताचा महान फलंदाज सचिन तेंडुलकरच्या नावाचाही समावेश आहे. तेंडुलकरने टेलरला ट्विट करुन त्याच्या सुवर्ण कारकिर्दीसाठी शुभेच्छा दिल्या.

मात्र, टेलरने तेंडुलकरच्या कौतुकास्पद ट्विटला हिंदीत उत्तर देऊन भारतीयांना सुखद धक्का दिला. सचिनने त्याच्या अधिकृत ट्विटर अकाऊंटवरून पहिले ट्विट केले आणि लिहिले, "रॉस, तू खेळाचा महान राजदूत होतास! तुझ्याविरुद्ध खेळणे सुंदर अनुभव होता. ज्या पद्धतीने तू स्वत:ला वर्षांनुवर्ष पुन्हा शोधून काढलेस ती गोष्ट क्रिकेटपटू बनण्याची आकांक्षा बाळगणाऱ्या सर्व लहान मुलांसाठी एक प्रेरणा आहेत. अप्रतिम कारकिर्दीबद्दल हार्दिक अभिनंदन."

सचिनच्या या ट्विटनंतर रॉस टेलरने हिंदीत ट्विट करुन त्यााला रिप्लाय दिला. टेलरने आपल्या ट्विटमध्ये लिहिले, "धन्यवाद सचिन भाई, तुमच्या कौतुकासाठी. माझ्या आवडत्या खेळाडूकडून हा संदेश मिळणे ही माझ्यासाठी सन्मानाची गोष्ट आहे."

38 वर्षीय रॉस टेलरने न्यूझीलंडसाठी त्याचा शेवटचा सामना म्हणून 4 एप्रिल रोजी मिल्टनमधील सेडन पार्क येथे नेदरलँड्सविरुद्ध एकदिवसीय सामना खेळला होता. राईट हॅन्ड बॅट्समन अशी ओळख असलेल्या रॉसने त्याच्या शेवटच्या सामन्यात मात्र केवळ 14 धावा केल्या होत्या. टेलरच्या या निरोपाच्या सामन्यात न्युझीलंडने मात्र 115 धावांनी शानदार विजय मिळवला होता.