SAFF Championship India Vs Pakistan : एकटा छेत्रीच बास! पहिल्याच हाफमध्ये पाकिस्तानची दयनीय अवस्था

SAFF Championship India Vs Pakistan : एसएएफएफ चॅम्पियनशिपमध्ये भारतीय संघाने पहिल्याच सामन्यातील पहिल्या हाफमध्येच आपला कट्टर प्रतिस्पर्धी पाकिस्तानची अवस्था दयनीय केली. भारतीय संघाचा स्टार फुटबॉलर सुनिल छेत्रीने अवघ्या 15 मिनिटात पाकिस्तानवर दोन गोलं केले. भारतीय संघाने पहिल्या हाफमध्ये बॉलवरील ताबा, पासेस आणि गोलपोस्टवर आक्रमण करण्यात आघाडी घेतली. पाकिस्तानला मात्र पहिल्या हाफमध्ये बॉलवर ताबा मिळवण्यात अपयश आले.

सामन्याला सुरूवात झाल्यानंतर भारतीय संघाने पाकिस्तानच्या गोलपोस्टवर त्वेशाने आक्रमण केले. सुनिल छेत्रीने 10 व्या मिनिटालाच गोल करत भारताचे खाते उघडले. त्यानंतर भारताने बॉल पाकिस्तानच्या गोलपोस्टजवळच ठेवला. भारतीय स्ट्रायकर्सनी सातत्याने पाकिस्तानच्या गोलपोस्टवर चढाया केल्या. दरम्यान, 16 व्या मिनिटाला सुनिल छेत्रीला पेनाल्टी मारण्याची संधी मिळाली. ही संधी छेत्रीने वाया न घालवता भारताचा आणि स्वतःचा देखील दुसरा गोल केला.

यानंतर भारतीय संघाने संपूर्ण पहिला हाफ बॉलवरचा आपला ताबा कायम ठेवला. भारताने या 45 मिनिटात पाकिस्तानच्या गोलपोस्टवर 12 वेळा चढाया केल्या. यातील 4 शॉट्स ऑन टार्गेट होते. तर 74 टक्के बॉल भारताच्या ताब्यात होता. भारताने तब्बल 237 पासेस दिले. यात 87 टक्के अचुकता होती.

दुसरीकडे पाकिस्तानला संपूर्ण पहिल्या हाफमध्ये 3 शॉट्सच मारण्याची संधी मिळाली. यातील एकही शॉट ऑन टार्गेट नव्हता. तर पहिल्या हाफमध्ये 25 टक्केच बॉलवर ताबा मिळवता आला. पास करण्याच्या बाबतीत देखील पाकिस्तानने कच खाल्ली. त्यांनी पहिल्या हाफमध्ये 84 पासेस दिले. त्यात फक्त 55 टक्के अचुकता होती. विशेष म्हणजे पहिल्या हाफमध्येच पाकिस्तानला दोन पिवळे कार्ड दाखवण्यात आले. इतका धसमुसळा खेळ त्यांनी केला.

(Sports Latest News)