पहिला गेम ११-२१ ने गमावला अन् मग भारतीय जोडीने सगळा खेळच फिरवला! सात्त्विक-चिरागचा चीनवर दणदणीत विजय, चायना मास्टर्समध्ये रचला इतिहास

शेनझेन (चीन) : सात्त्विक साईराज रंकीरेड्डी-चिराग शेट्टी या भारतीय जोडीने रविवारी इतिहास रचला. सात्त्विक साईराज रंकीरेड्डी-चिराग शेट्टी जोडीने अंतिम फेरीच्या लढतीत ही जी टिंग व रेन झियांग यू या जोडीवर तीन गेममध्ये रोमहर्षक विजय मिळवला आणि चायना मास्टर्स सुपर ७५० या बॅडमिंटन स्पर्धेतील पुरुष दुहेरीत विजेतेपदावर मोहर उमटवली. या स्पर्धेमध्ये जेतेपद पटकावणारी सात्त्विक साईराज रंकीरेड्डी-चिराग शेट्टी ही भारताची पहिलीच जोडी ठरली, हे विशेष.