अखेरच्या चढाईत तमीळ थलैवाजची बरोबरी

चेन्नई : सामन्यातील अखेरच्या चढाईत मनजीतची पकड करीत विनित शर्माने पकड केली. त्यामुळे तमीळ थलैवाजने प्रो कबड्डी लीगमध्ये पुणेरी पलटनला 31-31 असे बरोबरीत रोखले.

पुणेरी पलटनच्या सूरजीत सिंगने पकडीत सात गुण करताना डू आर डाय सुपर टॅकलची स्पर्धेतील दशकपूर्ती केली; पण अजित कुमार आणि राहुल चौधरीच्या चढायांतील आठ गुण तसेच विनित शर्माच्या पकडींनी तमीळला हार टाळता आली. पुण्याने चांगली कामगिरी केली होती; पण नितिन तोमरला अपेक्षित यश लाभले नाही. त्याला बारा चढाईत पाचच गुण मिळवता आले.

हरियाना स्टीलर्सची विजयी मालिका अखेर तेलुगु टायटन्सविरुद्ध संपुष्टात आली. हरियाणाला 29-40 अशी एकतर्फी हार पत्करावी लागली. विकास कंडोलाने पहिल्याच चढाईत गुण घेत हरियाणाला चांगली सुरुवात करून दिली; पण त्यानंतर सूरज आणि सिद्धार्थ या देसाईद्वयीने हरियाणाचा बचाव खिळखिळा केला. त्यामुळे तेलुगूने विश्रांतीस 21-13 वर्चस्व राखले.

उत्तरार्धात विकासला मैदानाबाहेर ठेवण्यात तेलुगुला यश आले. त्यामुळे दडपणाखाली हरियाणाकडून चुका झाल्या. त्यांची पिछाडी 16 गुणांवर गेली. तेलुगुने त्यानंतर सावध खेळ करीत विजय निसटू दिला नाही.