Tokyo Olympics: जोडी जमली! दीपिका-प्रवीण क्वॉर्टर फायनलमध्ये

टोकियो ऑलिम्पिक स्पर्धेत भारताची नंबर वन तिरंदाज दीपिका कुमारी (Deepika Kumari) ने महाराष्ट्राच्या प्रवीण जाधवच्या (Pravin Jadahv) साथीनं मिश्र प्रकारात आगेकूच केलीये. तिरंदाजीच्या मिक्सड टीम इवेंटमध्ये या दोघांनी क्वॉर्टर फायनलमध्ये जागा पक्की केलीये. राउंड ऑफ 16 मध्ये भारतीय जोडीने चीनी ताइपे जोडीला पराभूत केले. दीपिका आणि प्रवीण यांनी पिछावडीवरुन दमदार कमबॅक करत सामना जिंकला आणि देशाच्या पदकाच्या आशा कायम ठेवल्या. (Tokyo Olympics 2020 Indian Archers Deepika Kumari Pravin Jadhav Sail Into Quarters In Mixed Team Event)

8 सेटच्या लढतीत चीनी ताइपे जोडीने सुरुवातीला 3-1 अशी आघाडी मिळवली होती. त्यानंतर दीपिका आणि प्रवीणने जबरदस्त कमबॅक करत 5-3 असा विजय नोंदवला. पुढच्या फेरती त्यांचा सामना बांगलादेश आणि कोरिया यांच्यातील विजेत्याशी होणार आहे.

नवरा-बायकोची जोडी फुटली

आंतरराष्ट्रीय स्तरावर दीपिका आणि प्रवीण पहिल्यांदा सोबत खेळत आहेत. आतापर्यंत मिक्सड टीम इवेंटमध्ये दीपिका पती अंतनू दास याच्यासोबत मैदानात उतरल्याचे पाहायला मिळाले होते. ऑलिम्पिकपूर्वी या जोडीने सुवर्ण कामगिरी नोंदवत ऑलिम्पिकमध्ये दमदार कामगिरी करण्याचे संकेत दिले होते. मात्र आयत्या वेळी भारतीय तिरंदाजी संघाने मिश्र क्रीडा प्रकारातील दीपिकाचा जोडीदार बदलण्याचा निर्णय घेतला. अंतनू दास आणि प्रवीण यांच्यातील ऑलिम्पिक स्पर्धेतील कामगिरीच्या जोरावर हा निर्णय घेण्यात आला. अनुभवी दीपिकासोबत युवा प्रवीण चांगली कामगिरी करुन दाखवेल, असे भारतीय तिरंदाजी महासंघाला वाटते.

तिरंदाजी क्रीडा प्रकारातील वैयक्तिक इवेंटमध्ये प्रवीणची कामगिरी अंतनू दासपेक्षा सरस राहिली. मिक्सड टीममध्ये भारतीय तिरंदाजी जोडीत बदल करण्यात आला. दीपिका आणि प्रवीण यांना भारताने मैदानात उतरवले आहे. या जोडीने पदकाच्या आशा पल्लवित केल्या आहेत.