सबस्क्राईब करा
चेंगडू (चीन) : भारतीय युवा महिला बॅडमिंटन संघाचा उबेर करंडकातील अ गटातील अखेरच्या साखळी फेरीच्या लढतीत चीनकडून पराभव झाला. चीनने या लढतीत भारतीय संघावर ५-० असा विजय साकारला. या विजयामुळे चीनच्या संघाने तीन गुणांसह पहिले स्थान पटकावले. भारताला दुसऱ्या स्थानावर समाधान मानावे लागले. चीन व भारत या दोन्ही संघांनी या गटातून बाद फेरीत प्रवेश केला आहे. याच गटातील अन्य लढतीत कॅनडाने सिंगापूरचा ५-० असा धुव्वा उडवला व तिसरा क्रमांक पटकावला.
चेन यू फेई हिने एकेरीच्या पहिल्या लढतीत इशरानी बरुआ हिला २१-१२, २१-१० असे पराभूत करीत चीनला १-० अशी आघाडी मिळवून दिली. त्यानंतर चेन किंग - जिया फॅन या जोडीने प्रिया के. - श्रुती मिश्रा या भारतीय जोडीला २१-१३, २१-१२ असे सहज नमवले. हॅन युई - अनमोल खरब यांच्यामध्ये एकेरीची दुसरी लढत रंगली; पण ९-२१, १-४ अशा पिछाडीवर असताना अनमोल हिने दुखापतीमुळे माघार घेतली. त्यामुळे चीनला ३-० अशी विजयी आघाडी घेता आली.
परतीच्या दुहेरीच्या लढतीत सिमरन सिंघी रितिका ठाकेर या भारतीय जोडीला पराभवाचा सामना करावा लागला. लिऊ शू - टॅन निंग या जोडीने भारतीय जोडीला २१-९, २१-१० असे सरळ दोन गेममध्ये पराभूत केले. अखेरच्या लढतीत तन्वी शर्मा हिलाही विजय मिळवता आला नाही. वँग यी हिने तन्वी हिच्यावर २१-७, २१-१६ अशी मात केली.
माझ्या खेळावर मी नाराज आहे. माझ्याकडून खूप चुका झाल्या. चेन फेई हिने छान खेळ केला. माझ्यासाठी ही लढत आव्हानात्मक होती; पण चांगला अनुभव घेता आला.
-इशरानी बरुआ, बॅडमिंटनपटू, भारत
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.