'फादर्स डे'ला बोल्टची गोड बातमी; दुसऱ्यांदा बाप

'फादर्स डे'चं औचित्य साधत क्रीडा विश्‍वातील महान धावपटू उसेन बोल्ट यानं आपल्या चाहत्यांसोबत आनंदाची बातमी शेअर केली आहे. उसेन बोल्ट दुसऱ्यांदा बाप बनला आहे. पत्नी केसी बेनेटने जुळ्यांना जन्म दिला आहे. बोल्टनं आपल्या मुलांची नावं खूपच खास ठेवली आहेत. बोल्टनं जुळ्यांची नावं थंडर बोल्ट आणि सेंट लियो बोल्ट अशी ठेवली आहेत. तर गेल्यावर्षी झालेल्या मुलीचं नाव ऑलंपिया लायटनिंग बोल्ट असं ठेवलं होतं.

उसेन बोल्टनं आपल्या इन्स्टाग्रामवर पोस्ट करत जुळ्या मुलांची माहिती दिली आहे. जुळ्या मुलांचा जन्म केव्हा झाला याबाबतची कोणतीही माहिती बोल्ट दाम्पत्यांकडून देण्यात आलेली नाही. मात्र, 'फादर्स डे'चं औचित्य साधत चाहत्यांसोबत आनंदाची बातमी शेअर केली आहे. बोल्टच्या तिन्ही मुलांची नावं सध्या सोशल मीडियावर चर्चेचा विषय आहे.

ऑलंपिया लायटनिंग बोल्टचा जन्म मे 2020 मध्ये झाला होता. 34 वर्षीय उसेन बोल्टनं सोशल मीडियाच्या माध्यमातून पुन्हा पिता झाल्याची माहिती दिली आहे. केसी बेनेट आणि उसेन बोल्ट यांनी आपल्या कुटुंबाचा फोटो सोशल मीडियावर पोस्ट केला आहे. या फोटोवर नेटकऱ्यांनी कमेंटचा वर्षाव करत अभिनंद केलं आहे.

34 वर्षीय उसेन बोल्टने ऑलिंपिक गेम्समध्ये आठ वेळा सुवर्णपद जिंकलं आहे. 100 आणि 200 मीटर स्पर्धेत उसेन बोल्टने विश्वविक्रम केला आहे. जवळपास दशकभर उसेन बोल्टचा दबदबा होता. 2017 मध्ये बोल्टने सन्यास घेतला.