T20 World Cup 2022 : विश्वकरंडकात जडेजाची उणीव भासेल : जयवर्धने

दुबई : आगामी ट्वेन्टी-२० विश्वकरंडकासाठी भारतीय संघात रवींद्र जडेजा दुखापतीमुळे खेळू शकणार नसल्यामुळे संघाला त्याचा मोठा धक्का बसला असल्याचे मत श्रीलंकेचा महान फलंदाज महेला जयवर्धने याने व्यक्त केले आहे.

गुडघ्यावर झालेल्या शस्त्रक्रियेमुळे जडेजाला काही महिने भारतीय क्रिकेट संघापासून लांब राहावे लागणार आहे. उजव्या पायाच्या गुडघ्याला दुखापत झाल्यामुळे जडेजा वेस्टइंडीजविरुद्धच्या मालिकेमध्ये खेळू शकला नव्हता. तसेच त्याला आशिया करंडक मध्यातून सोडावा लागला होता. जडेजाच्या दुखापतीबद्दल आयसीसीशी बोलताना जयवर्धने म्हणाला, की ‘‘रवींद्र जडेजा पाचव्या क्रमांकावर येऊन फलंदाजी करतो; तसेच हार्दिक पंड्या सहाव्या क्रमांकावर येऊन फलंदाजी करतो. हे दोघेही अष्टपैलू खेळाडू असल्यामुळे भारतीय संघाला फलंदाजीत बरेच पर्याय उपलब्ध होतात.

डाव्या हाताने फलंदाजी करणारा जडेजा भारतीय संघात नसल्यामुळे संघाला डावखुऱ्या फलंदाजाची उणीव जाणवणार आहे. दिनेश कार्तिकला भारतीय संघात घेण्याऐवजी रिषभ पंतला खेळवले, तर भारतीय संघाला जाणवणाऱ्या डावखुऱ्या फलंदाजांची उणीव भरून निघेल’’ असेही मत जयवर्धने याने मुलाखतीत व्यक्त केले आहे.