कर हर मैदान फ़तेह! रशियातील कुस्ती स्पर्धेत भारताच्या पृथ्वीराजला 'कांस्य'

कोल्हापूर : उफा (रशिया Russia) येथे सुरु असलेल्या जागतिक ज्युनिअर फ्री स्टाईल कुस्ती स्पर्धेसाठी (Junior freestyle wrestling competition) देवठाणे (ता. पन्हाळा) येथील कुस्तीपटू पृथ्वीराज पाटीलने (Wrestler Prithviraj Patil) कांस्य पदकाची कमाई केली आहे. ९२ किलो वजनी गटात चुरशीच्या लढतीत रशियाचा प्रतिस्पर्धी मल्ल किरील्लोवला धूळ चारत २-१ गुणाच्या फरकाने त्याने हा विजय मिळवला आहे.

पैलवान पृथ्वीराज हा शाहू कुस्ती केंद्र, शिंगणापूर (ता. करवीर) येथे वस्ताद जालिंदर मुंडे व माजी आंतरराष्ट्रीय कुस्तीगीर शिवाजी पाटील, प्रशिक्षक सुनील फाटक यांच्या मार्गदर्शनाखाली सराव करतो. तसेच उप महाराष्ट्र केसरी संग्राम पाटील, पै. धनाजी पाटील, वडील बाबासाहेब पाटील व आजोबा मारुती पाटील यांच्या पाठिंब्याच्या जोरावर त्याने यशाला गवसणी घातलीय. 'बॅक थ्रो' डावावर हुकूमत असलेल्या या कोल्हापूरच्या युवा मल्लाकडून अधिक अपेक्षा उंचावल्या आहेत. पैलवान पृथ्वीराज ऑलिम्पिकमध्ये पदक जिंकण्याचे स्वप्न उराशी बाळगून आपली वाटचाल सध्या करत आहे.