आयुष्याला आईमुळेच उभारी

प्रत्येकासाठी आपली आई अतिशय महत्त्वाचीच असते. कारण लहानपणापासून तिनं आपल्यासाठी खूप काही केलेलं असतं. मी अभिनय क्षेत्रात पदार्पण करून साधारण १३ ते १४ वर्षं झाली; पण अशा पद्धतीच्या वेगळ्या क्षेत्रात आपल्या मुलीनं जाणं किंवा काम करण्यासाठी कुटुंबाचा पाठिंबा खूप महत्त्वाचा असतो..एक पार्टनर म्हणून नवरा, माझी आई आणि माझ्या सासूबाई म्हणजेच माझी दुसरी आई, अशा सगळ्यांचाच पाठिंबा मला कायम होता. माझ्या आईची आणि आता मीसुद्धा आई झाली असले, तरी तिची भूमिका अजूनही महत्त्वाची आहे. आयुष्याच्या प्रत्येक टप्प्यावर तिचं असणं खूप महत्त्वाचं आहे..माझ्या लग्नानंतर मी अभिनय क्षेत्रात आले, त्यामुळे या क्षेत्रातील माझा प्रवास किंवा त्याच्यातील चढ-उतार, आमची एक कलाकार म्हणून घडण आणि आयुष्याचे वेगवेगळे टप्पे या सगळ्यांमध्ये तिचा असणारा आधार माझ्यासाठी सगळ्यात महत्त्वाचा होता.त्याच्याही आधी शाळा- कॉलेज, नोकरी यातही ती असतेच. कुठलं भांडण झालं किंवा बाबांना कुठल्यातरी गोष्टीसाठी मनवायचं असो, आई मला हे नाटक करायचंय, मला हा प्रोजेक्ट घ्यायचाय किंवा मला ट्रीपला जायचंय या अशा छोट्या छोट्या गोष्टींसाठी आईलाच पुढे केलं जायचं..मी नाटकांमध्ये कामाला सुरुवात केली. ‘घाशीराम कोतवाल’, ‘आई रिटायर होतेय’ याबरोबरच काही प्रायोगिक नाटकं केली. त्यानंतर पुणे-मुंबई प्रवास, विविध ऑडिशन्स, हळूहळू मिळत गेलेल्या भूमिका आणि त्यानंतर चित्रपटांच्या दिशेने वाटचाल असा प्रवास होता.माझ्या आईलाही या सगळ्याची कुठेतरी आधीपासून आवड होती, ती कथक शिकलेली आहे. या सगळ्याची गोडी आणि सुप्त इच्छा तिच्यात होती, त्या सगळ्या गोष्टी माझ्यात आलेल्या आहेत, असं मला वाटतं..आयुष्याकडे बघण्याचा एक सकारात्मक दृष्टिकोन तिच्याकडे आहे. माझा मुलगा वीर आता दोन वर्षांचा झालेला आहे, आता मी पुन्हा कामाला सुरुवात केली आहे. कामातून ब्रेक घेतल्यानंतर परत काम मिळवण्यासाठी थोडीफार धडपड करावी लागते, या अशा परिस्थितीमध्ये माझी आई मला सकारात्मक ठेवण्याचे काम करते. आईकडे असणारी सकारात्मकता माझ्यात यावी, असं मला वाटतं.लहानपणापासून आईने आपल्यासाठी खूपशा गोष्टींचा त्याग आणि तडजोडी केलेल्या असतात. अगदी शाळेत असल्यापासून किंवा त्याच्याही आधीपासून. आम्हा दोन्ही मुलांना सांभाळणं, शिवाय बाबा बँकेत नोकरीला असल्याने त्यांच्या सतत होणाऱ्या बदल्या यासाठी तिनंही तिची बँकेतली चांगल्या पगाराची नोकरी सोडली..आम्हा भावंडांना सांभाळणं आणि आमच्यासाठी वेळ देणं या गोष्टीलाच कायम तिनं प्राधान्य दिलं. मी पुढे काय करायचं, कोणत्या कॉलेजमध्ये जायचं, कोणत्या क्षेत्रात जायचं त्या दृष्टीने काय करता येईल, याच गोष्टींसाठी तिची धडपड असायची. माझ्या डान्स क्लाससाठी ती पैशांची बचत करायची, साठवलेल्या पैशांमधून मला छानसा ड्रेस घ्यायची.तिने केलेल्या तडजोडीमुळे आपल्या मनासारखं करणं शक्य झालं, या गोष्टी आता फार जाणवतात. माझ्या कामासाठी मी मुंबईतच राहायचे. अनेकदा पुण्यातून जाऊन-येऊन करायचे. मुंबईत काम करताना कसं होईल, कशा पद्धतीचे लोक भेटतील या गोष्टी असतातच. पण तरीसुद्धा कधीही नकारात्मक विचार न करता अढळ असा विश्वास ठेवून माझ्यासोबत ती उभी राहिली..मला काही दुखलं-खूपलं किंवा मूड नाहीये अशा गोष्टी न सांगता नुसत्या आवाजावरूनसुद्धा माझी आई आणि सासूबाईना ओळखता येतात.आता मी पुन्हा अभिनयात कामाला सुरुवात केलेली आहे- आताही आईचा तेवढाच पाठिंबा आहे. चित्रीकरणासाठी दोन- दोन दिवस मी मुंबईला जाते, तर वीरला त्याची आजी सांभाळते. माझी आई आणि माझी सासू दोघीही अत्यंत मायेनं सांभाळतात. आजीपेक्षा दुसरी आई म्हणूनच त्याचा जास्त सांभाळ करतात. याबाबत मी खूप भाग्यवान आहे.(शब्दांकन : श्रुती भागवत).सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.