Makar Sankranti 2024 : मकर संक्रांतीला ‘या’ सोप्या आणि आकर्षक रांगोळ्या, वाढवतील तुमच्या अंगणाची शोभा!

Makar Sankranti 2024 : अवघ्या २ दिवसांवर मकर संक्रांतीचा सण येऊन ठेपला आहे. देशभरात मकरसंक्रांतीचा हा सण मोठ्या उत्साहात आणि आनंदात साजरा केला जातो. या सणाला फार मोठी परंपरा आहे. देशातील विविध राज्यांमध्ये वेगवेगळ्या परंपरा आणि विविध नावांनी हा सण साजरा केला जातो.

मकर संक्रांतीपूर्वी देशात लोहरी आणि भोगीचा उत्साह पहायला मिळत आहे. रविवारी (१४ जानेवारीला) देशात भोगी आणि लोहरीचा सण साजरा केला जाणार आहे. त्याची सध्या सर्वत्र लगबग पहायला मिळत आहे.

मकर संक्रांतीच्या दिवशी सकाळी अंगणात सुरेख आणि आकर्षक रांगोळ्या काढल्या जातात. या रांगोळ्यांमुळे अंगणाला शोभा येते. आज आम्ही तुम्हाला खास मकर संक्रांतीनिमित्त रांगोळीच्या आकर्षक डिझाईन्सबद्दल सांगणार आहोत.

हळदी-कुंकू स्पेशल रांगोळी

मकर संक्रांतीच्या दिवशी महिला वाण लूटतात. या वाण लूटण्याला ही खास असे महत्व आहे. काही महिला मकर संक्रांतीच्या दिवशी हळदी-कुंकवाच्या कार्यक्रमाचे आयोजन करतात. त्यासाठी खास रांगोळी देखील काढली जाते.

तुम्ही सुद्धा या प्रकारची हळदी-कुंकू स्पेशल रांगोळी अंगणात काढू शकता. त्यासाठी तुम्हाला पट्टीची मदत घ्यावी लागेल. या पट्टीच्या मदतीने पतंग काढायला सोपे जाईल. त्यानंतर, पतंगाच्या डिझाईनला जोडून अर्धगोलाकार काढून तुम्ही फुलांची छान डिझाईन काढू शकता. त्यात आता मस्त रंगीबेरंगी रंग भरा आणि मधोमध हळदी-कुंकू लिहायला विसरू नका.

गोलाकार मकरसंक्रांती स्पेशल रांगोळी

मकर संक्रांतीसाठी जर तुम्हाला सिंपल आणि सोबर रांगोळी काढायची असेल तर ही रांगोळी एकदम परफेक्ट आहे. या प्रकारच्या रांगोळीत तुम्ही सिंपल गोल काढून त्यात तुमच्या आवडीप्रमाणे रंग भरू शकता.

त्यानंतर, एका बाजूने छोटासा पतंग रेखाटून मधोमध मकर संक्रांती स्पेशल किंवा शुभ मकर संक्रांती असे रेखाटू शकता. जसे या रांगोळीमध्ये रेखाटण्यात आले आहे.

पतंग आणि तिळाच्या लाडूंची डिझाईन

मकर संक्रांत म्हटलं की तिळाचे लाडू आणि पतंग हे आलेच. पतंग आणि तिळाच्या लाडूंशिवाय आपली मकर संक्रांत ही अपूर्ण आहे, असे म्हटले तरी ते चुकीचे ठरणार नाही.

जर तुम्हाला तिळाचे लाडू आणि पतंग स्पेशल रांगोळी काढायची असेल तर तुम्ही या प्रकारची रांगोळी नक्कीच काढू शकता.