नातीगोती : नात्यांमध्ये नको दुरावा

- मोहित डग्गा

कुटुंबव्यवस्था प्रेमावर आणि विश्वासावर अवलंबून असते. आणखी एक गोष्ट अशी सांगावीशी वाटेल, की काही गोष्टींकडे दुर्लक्ष करून व समजून घेण्यातच समजूतदारपणा असतो.

आमच्या कुटुंबात आई आणि बाबा हे दोघेही माझ्या खूप जवळचे आहेत; कारण मला असे वाटते, की आपण जन्माला येतो त्या वेळेपासूनच ते आपली खूप साथ देतात व स्वतःच्या पायावर उभे राहण्याची क्षमता देतात. मी आणखी एका व्यक्तीबद्दल आवडीने सांगीन, ती म्हणजे माझी पत्नी. तिने मला आजपर्यंत खूप साथ दिली आहे. माझ्या कठीण काळात ती माझ्या पाठीशी खंबीरपणे उभी राहिली आहे. यापेक्षा आपल्याला काय पाहिजे आयुष्यात?

कठीण काळात जेव्हा माणसाला आपल्या कुटुंबाची खूप गरज असते, तेव्हा त्यांचा पाठिंबा खूप उपयोगी पडतो. नुकतेच माझ्या पत्नीला रुग्णालयामध्ये उपचारासाठी दाखल केले होते. तेव्हा माझे आई-बाबा व भाऊ एकत्र येऊन त्यांनी मला धीर दिला. त्यामुळे मला खूप बरे वाटले आणि मला खूप मोठा मानसिक आधार मिळाला. हाच मानसिक आधार आपल्याला आयुष्यात मोठे करण्यास हातभार लावतो, हेच माझ्या कुटुंबाचे वैशिष्ट्य आहे. विशेष म्हणजे आमच्या कुटुंबातील सर्वजण चांगल्या व कठीण काळात एकमेकांना साथ देतो.

सध्या मी झी टीव्हीवर ‘दुसरी माँ’ या मालिकेत अशोकची भूमिका साकारत आहेत. चित्रीकरणामुळे मी अनेकदा व्यग्र असतो. त्यामुळे कुटुंबाला फारसा वेळ देता येत नाही. मात्र, जेव्हा वेळ असेल आणि आम्ही सर्वजण एकत्र असतो, त्यावेळी खूप गप्पागोष्टी होतात. जुन्या आठवणींना उजाळा देतो. आई-बाबा आम्हाला लहानपणीच्या आठवणी सांगतात. एक महत्त्वाची गोष्ट म्हणजे, मी आणि माझी पत्नी आम्ही शाळेपासून एकत्र असल्यामुळे आम्ही खूप धम्माल केली आहे. जुन्या आठवणी आल्या, की मन भरून पावते.

माझे ठाम मत आहे, की चांगल्या क्षणांत, आनंदात सगळे आपल्या पाठीशी उभे असतात; पण कठीण वेळेत जेव्हा आपले कुटुंब आपल्या बरोबर असते, तेव्हा कुठलीही गोष्ट अशक्य नसते.

आपण समोरच्या व्यक्तीवर विश्वास ठेवला व काही लहान गोष्टींकडे दुर्लक्ष केले, तर नात्यांमध्ये काहीही अडचणी येणार नाहीत. धावपळीच्या जीवनात आपण जेव्हा समोरच्या व्यक्तीबरोबर लहान गोष्टींवरून भांडण करतो, तेव्हा नात्यांमध्ये दुरावा येतो व माणसांमध्ये अंतर वाढते. त्यामुळे नातेसंबंध चांगले राहण्यासाठी बारीकसारीक चुकांकडे दुर्लक्ष करा.

नाती दृढ होण्यासाठी....

1) नात्यात विश्वास व प्रेम असावे.

2) कुटुंबातील सर्वांनी मिळून मिसळून राहावे. एकमेकांबद्दल राग राग करू नये.

3) कठीण परिस्थितीत आपल्या कुटुंबासोबत खंबीरपणे उभे रहावे.

4) वेळ मिळेल तेव्हा इतर गोष्टी बाजूला ठेवून आपल्या कुटुंबासोबत वेळ द्यावा.

5) नेहमी आपल्‍या कुटुंबाला प्राधान्‍य द्यावे.

(शब्दांकन : अरुण सुर्वे)