National Farmer Day 2023 : राष्ट्रीय शेतकरी दिन का साजरा केला जातो? जाणून घ्या 'या' दिनाचा इतिहास

National Farmer Day 2023 : शेतकऱ्याला 'जगाचा पोशिंदा' असे म्हटले जाते. जगात शेतकरी नसेल तर मग आपल्या अस्तित्वाला काहीच अर्थ राहणार नाही. कारण, शेतकऱ्याने पिकवलेल्या धान्यामुळे, पिकांमुळे, आज आपल्याला जेवायला अन्न मिळते, हे कुणीच नाकारू शकत नाही.

शेतकऱ्यांप्रती कृतज्ञता व्यक्त करण्यासाठी देशात दरवर्षी २३ डिसेंबरला 'राष्ट्रीय शेतकरी दिन' साजरा केला जातो. आज राष्ट्रीय शेतकरी दिन आहे, या निमित्ताने देशभरातील शेतकऱ्यांच्या योगदानानिमित्त कृतज्ञता आणि आदर व्यक्त केला जातो.

शेतकरी दिनानिमित्त देशभरात विविध कार्यक्रमांचे आयोजन देखील केले जाते. भारताचे पाचवे पंतप्रधान आणि शेतकऱ्यांचे कैवारी स्वर्गीय चौधरी चरणसिंग यांच्या जयंनीमित्त हा विशेष दिवस साजरा केला जातो.

राष्ट्रीय शेतकरी दिनाचा इतिहास काय?

भारत हा कृषिप्रधान देश आहे. आपल्या देशातील ५० टक्क्यांहून अधिक लोकांच्या प्रमुख उपजिविकेचे साधन शेती आहे. त्यामुळे, शेतकऱ्यांचा सन्मान करण्यासाठी आणि त्यांच्याप्रती कृतज्ञता व्यक्त करण्यासाठी आणि देशात शेतीबद्दल जागरूकता निर्माण करण्यासाठी २३ डिसेंबरला हा राष्ट्रीय शेतकरी दिन साजरा केला जातो.

राष्ट्रीय शेतकरी दिनाचा इतिहास सांगायचे झाल्यास २००१ मध्ये माजी पंतप्रधान स्वर्गीय चौधरी चरणसिंग यांच्या वाढदिवसानिमित्त आणि त्यांच्या स्मरणार्थ हा राष्ट्रीय शेतकरी दिन साजरा करण्याची घोषणा करण्यात आली होती.

खरं तर तेव्हापासूनच आपल्या देशात दरवर्षी २३ डिसेंबर हा दिवस राष्ट्रीय शेतकरी दिन म्हणून साजरा केला जातो. ही परंपरा आज ही कायम आहे. (National Farmer Day History)

राष्ट्रीय शेतकरी दिन का साजरा केला जातो?

भारतातील शेतकऱ्यांची स्थिती सुधारण्यासाठी पंतप्रधान चौधरी चरणसिंग यांनी विशेष प्रयत्न केले होते. त्यामुळे, शेतकऱ्यांची स्थिती सुधारण्याचे श्रेय त्यांना दिले जाते. चौधरी चरणसिंग हे स्वत: शेतकरी कुटुंबातील असल्यामुळे त्यांना शेतकऱ्यांच्या समस्या आणि परिस्थितीची चांगली जाण होती, त्यामुळे त्यांनी शेतकऱ्यांची स्थिती सुधारण्यासाठी अनेक कामे केली होती.

शेतकऱ्यांच्या कष्टामुळे सर्वसामान्यांच्या ताटात अन्न येते आणि शेतकऱ्यांमुळेच आज आपण दोन घास सुखाचे खातोय, हे आपल्याला मान्य करावेच लागेल. त्यामुळे, शेतकऱ्यांचा आदर करणे आणि देशात शेतीबद्दल जागरूकता निर्माण करणे हा या दिनाचा मुख्य हेतू आहे. (National Farmer Day)