Heat Wave: शरीरामधील उष्णतेत होते वाढ; जडतात मूळव्याध, ॲसिडिटीसारखे आजार

Heat Wave: वाढत्या तापमानामुळे शरीराच्या उष्णतेतही वाढ होते. यामुळे पोटात आग होणे, मूळव्याध, ॲसिडिटी यासारखे आजार जडतात. योग्य काळजी आणि आहार घेतल्यास यावर नियंत्रण मिळवणे शक्य असल्याचे तज्ज्ञांचे मत आहे.

उन्हाळ्यात ‘सन स्ट्रोक’चा धोका अधिक असतो. वाढत्या तापमानाचा परिणाम आपल्या शरीरावरही होतो. त्यामुळे पाणी कमी होऊन शरीरातील उष्णता वाढते. यासाठी जास्तीत-जास्त द्रव पदार्थांचा आहारात समावेश करावा. गोड, थंड पदार्थांचे सेवन करावे. यासह शरीरातील इलेक्ट्रोराइटचे प्रमाण योग्य ठेवणे महत्त्वाचे ठरते. शरीरातील उष्णता वाढल्यास घरात असतानाही माणसाला धोका संभवतो. यामुळे योग्य काळजी घेणे महत्त्वाचे ठरते.

अशी घ्यावी काळजी

• भरपूर पाणी पिऊन घराबाहेर पडावे.

• बाहेर पडताना पांढऱ्या कपड्याने कान झाकावे.

• लस्सी, ताक, लिंबू पाणी, पन्हे, कोकम शरबत घ्यावे.

• इलेक्ट्रोराइट बॅलन्स साठी लोणचे,चटणी याचे सेवन वाढवावे.

• वाळा, चंदन, नागरमोथा थंड पाण्यात भिजवून ते पाणी प्यावे.

• जिरेपूड टाकून देखील ताकाचे सेवन करू शकतात.

तापमान वाढ रोखण्यासाठी झाडे लावणे उत्तम पर्याय. तापमानवाढीचा परिणाम शरीराच्या उष्णतेवर होत असल्याने, आहारदेखील महत्त्वाचा ठरतो. पोटात आग होणे, मूळव्याध, ॲसिडिटी यासारखे आजार होतात. यासाठी द्रव आहाराचे सेवन वाढवावे. त्यात वेगवेगळे शरबत, पन्हे, ताक, लस्सी यांचा समावेश करू शकता.

- डॉ. मनोज जोशी, आयुर्वेदतज्ज्ञ