स्वीकाराचा मंत्र

- अश्विनी आपटे- खुर्जेकरआपल्याला नेहमी आपल्यासारखंच काहीतरी आवडतं आणि पटतं. म्हणजे आपल्यासारखं विचार करणारे, आपल्यासारखं वागणारे, आपल्याप्रमाणेच राहणारे लोक आपल्याला जवळचे आणि योग्य वाटतात. आपल्यापेक्षा वेगळं कोणी काही वागत असेल किंवा करत असेल तर आपण गोंधळून जातो, अस्वस्थ होतो. कधी कधी चिडतोही..याची सुरुवात होते, अगदी आपल्या घरापासून आणि घरातल्या लोकांपासून. जिथे एकाच घरातल्या दोन व्यक्ती एकसारख्या नसतात, तिथे दुसऱ्यांनी आपल्यासारखं बोलावं, वागावं, विचार करावा, अशी आपण इच्छा करतो आणि आपली अपेक्षा असते; पण यामध्ये आपण एक महत्त्वाची गोष्ट विसरतो, की समोरची व्यक्ती जशी आहे तशीच योग्य आहे आणि आपल्यालाच ‘स्वीकार करणं’ शिकण्याची गरज आहे..मैत्रिणींनो, एखाद्याचा स्वीकार करणं म्हणजे त्याची मतं, वागणं, निवड, शैली हे सगळं त्याच्या दृष्टीनं बरोबर आहे हे समजून घेणे. याचा अर्थ असा नाही, की तुम्ही समोरच्या व्यक्तीचं सगळं मान्य करावं किंवा स्वतःचे विचार सोडून द्यावे; पण दुसऱ्याचं वेगळं असणं चुकीचं आहे, असा दृष्टिकोन सोडणं हा स्वीकार आहे..दुसऱ्यांना स्वीकारणं काही जणांना सहज जमतं, उपजत असतं, तर काही वेळेला आपल्याला प्रयत्नांनी शिकावं लागतं. दुसऱ्यांना स्वीकारणं ही एक सवय आहे; पण ती खूप उपयोगी आहे हे नक्की. आपल्या आजूबाजूला, मग अगदी घरात, कामाच्या ठिकाणी, शिक्षणाच्या ठिकाणी, वेगवेगळ्या पार्श्वभूमीतले, विचारसरणीतले, स्वभावाचे लोक असतात. त्यांच्या दृष्टिकोनातून बघायला शिकलं, की नातेसंबंध सुधारतात. मतभेदही सुसंवादात बदलतो. उगाचच कोणाचा राग येत नाही, द्वेष वाटत नाही. घरात, ऑफिसमध्ये, मैत्रीत कुठेही विविधतेचा स्वीकार करणारी ही वृत्ती महत्त्वाची ठरते..हा स्वीकार फक्त इतर लोकांसाठी नाही, तर तुमच्या मानसिक स्वास्थ्यासाठी आणि तुमच्या स्वतःच्या व्यक्तिमत्त्वासाठीही तितकाच महत्त्वाचा आहे. जो दुसऱ्यांना समजून घेतो, त्यांच्या वेगळेपणाचा आदर करतो, तो अधिक समंजस, परिपक्व आणि आत्मविश्वासू समजला जातो. कारण तो सतत दुसऱ्यांना बदलायचा प्रयत्न करत नाही. उलट शांतपणे परिस्थिती हाताळतो आणि हीच गोष्ट तुम्हाला एक चांगली व्यक्ती म्हणून ओळख मिळवून देते..आपण अनेकदा ‘तिला काय कळतंय?’, ‘असं कोण वागतं?’ ‘त्यात काय एवढं एवढी साधी गोष्ट जमत नाही?’ असं बोलत असतो. अशा बोलण्यामागे असतो स्वीकाराचा अभाव. कुणीतरी आपल्यापेक्षा वेगळे वागत असेल, वेगळं राहत असेल, वेगळं बोलत असेल तर त्यांच्यावर प्रश्नचिन्ह लावण्याऐवजी, कमी लेखण्याऐवजी, ‘हा दृष्टिकोन वेगळा आहे. मला अजून समजून घ्यायला आवडेल. मी तुझ्या मतांचा आदर करते,’ अशा गोष्टी म्हणता आल्या पाहिजेत..हे शिकणं, याची सवय करणं सुरुवातीला थोडं अडचणीचं वाटू शकतं. कारण वेगळ्या मतांचा, दृष्टिकोनांचा, वागणुकीचा, सवयींचा स्वीकार करणं कठीण असते; पण ठाम निश्चय केला, आणि रोजच्या संवादात, वागण्यात सराव करत राहिलो, तर समोरच्याचा स्वीकार करणं आपल्या स्वभावाचा एक भाग बनून बसेल.जेव्हा एखादी व्यक्ती समोरच्याला जसं आहे तसं स्वीकारते, त्याच्या मतांचा, वागणुकीचा आदर करते - तेव्हा लोक त्या व्यक्तीभोवती मोकळेपणाने वागू शकतात. अशा स्वीकारशील व्यक्तींशी संवाद साधणं सोपं जातं, मन मोकळं करता येतं, आणि विश्वासाचं नातं निर्माण होतं. अशा लोकांभोवतीची सकारात्मक ऊर्जा इतरांनाही आकर्षित करते..मैत्रिणींनो, लक्षात ठेवा, दुसऱ्यांबाबत आपण स्वीकार बाळगायला पाहिजे, तसाच तो स्वतःबद्दल असावा. आपल्या चुका, कमतरता, बदलते मूड्स हे मान्य करणं म्हणजे आत्मस्वीकृती. जी आपल्या आत्मविश्वासाचा पाया ठरेल. जी व्यक्ती स्वतःला स्वीकारते तीच खऱ्या अर्थाने इतरांचा स्वीकार करू शकते.तर मग, आजपासूनच एक छोटं पाऊल उचलूया. प्रत्येक वेगळ्या गोष्टीकडे उत्सुकतेने बघूया. प्रश्न विचारण्याऐवजी समजून घेण्याचा प्रयत्न करूया. मतभेद असूनही सुसंवाद ठेवूया आणि मग बघा, तुमचं आमचं सगळ्यांचं जग किती सुंदर आणि सोपं होतं ते..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

स्वीकाराचा मंत्र

Related Stories