गोष्ट एका ‘पेरणी’ची

प्रसिद्ध अभिनेत्री मृण्मयी देशपांडे हे एक सर्जनशील व्यक्तिमत्त्व. ग्लॅमरपासून शेतीपर्यंत तिला आलेल्या अनुभवांची ही रसरशीत शब्दभ्रमंती. आजपासून दर पंधरवड्याला..यंदाच्या नवीन वर्षी माझा एक महत्त्वाचा संकल्प होताच, लिखाण पुन्हा सुरू करायचं होतं. वृत्तपत्रांच्या बाबतीमध्ये मला कायम असं वाटतं, की पत्रकारांचं प्रत्येकावर बारीक लक्ष असतं! आम्हा कलाकारांच्या बाबतीत काय घडतंय, नवीन काही करतोय का? हे कदाचित आम्हाला कळण्याच्या आधी त्यांना माहिती असतं...पण मला लिहायचं आहे हे माझ्या मनामधलं त्यांना कळणं हे जरा ‘अतीच’ झालं... मजेचा मुद्दा सोडून देऊ; पण खरोखरच या कॉलम साठी मला फोन आल्यानंतर मला प्रचंड आनंद झाला..माझ्या लिखाणाची सुरुवात ही ‘सकाळ’बरोबरच झाली आहे. जवळजवळ तेरा-चौदा वर्षांपूर्वी ‘गुड मॉर्निंग’ या सदराबरोबर तो प्रवास सुरू झाला. तेव्हा इंडस्ट्री नवीन होती, स्वप्नं नवीन होती. प्रत्येक क्षण काहीतरी नवीन घेऊन येत होता. गोष्टींचं अप्रूप होतं, रोज काहीतरी सांगण्यासारखं होतं.आता नक्की कुठल्या गोष्टी बदलल्या आहेत हे कळत नाहीये; पण या क्षेत्रातला सोळा वर्षांचा अनुभव, आयुष्यात घेतलेले वेगवेगळे निर्णय, बदललेली भौगोलिक सामाजिक परिस्थिती... या सगळ्यामुळे ‘माणूस’ म्हणून खूप बदलले हे मात्र नक्की. आतासुद्धा प्रत्येक क्षण काहीतरी नवीन घेऊन येतो; पण त्या प्रत्येक क्षणाला कसा हाताळायचं, हे मात्र अनुभव शिकवून गेला आहे. गोष्टींबद्दल अप्रूप अजूनही वाटतं; पण आता त्या ‘अप्रूपाला’सुद्धा समजूतदारपणाची आणि शहाणपणाची किनार आली आहे..सुरुवातीला ‘सकाळ’मध्ये लेख लिहायला मिळणार याचाच आनंद होता. आता वाढलेल्या वयाबरोबर म्हणा आणि अर्थातच त्याबरोबर आलेल्या अनुभवामुळे म्हणा, आपल्याला मिळालेल्या जागेचा योग्य उपयोग करणं किती महत्त्वाचं असतं हे कळलंय.मग ती शेतीसाठी असू दे, किंवा एखाद्या वृत्तपत्रांमध्ये आपल्या शब्दांसाठीची असू दे! तिथं आपण जे पेरणार आहोत त्याच्यावर आपलं आणि आपल्या पुढच्या पिढ्यांचं बरंच काही अवलंबून आहे. मग ते अन्न असो किंवा शब्द. ते विषमुक्त असावं. कोणाच्याही पोटात गेल्यावर त्याचा तोटा नाही तर फायदा झाला पाहिजे एवढंच मनात ठेवून लिहायचं आहे..गेल्या पाच वर्षांपूर्वी आम्ही पुणे, मुंबई सोडून महाबळेश्वरला आलो हे आता बऱ्याच जणांना माहिती आहे; पण तो सगळा प्रवास कसा होता, हे माहिती नाहीये. सिनेमा किंवा मनोरंजनाचं माध्यम आपल्याला हेच शिकवतं, की डेस्टिनेशनपेक्षा प्रवास जास्त मजेशीर असतो. तुमच्याबरोबर तो सगळा प्रवास शेअर करायला आवडेल.ग्लॅमर इंडस्ट्री आणि शेतातली माती.. दोन्ही गोष्टी परस्परविरोधी.. पण कदाचित म्हणूनच बॅलन्स टिकून राहिलाय.. म्हणतात ना तुमची मुळं जितकी खोल रुजलेली असतील, तेवढं तुम्हाला जास्त उंच जाता येतं. खोली आणि उंची दोन्ही परस्परविरोधी गोष्टी... पण खोली गाठल्याशिवाय उंची गाठता येत नाही..तर मित्रांनो आणि मैत्रिणींनो, ही आपली जागा असणार आहे. तुमच्याबरोबर गप्पा मारायला, चांगले-वाईट अनुभव शेअर करायला, आणि या नवीन वर्षी केलेला माझा लिखाणाचा संकल्प पूर्ण करायला मी खूप खूप उत्सुक आहे..हा सुरुवातीचा पहिला लेख लिहीत असताना, स्ट्रॉबेरी खायला येत असलेल्या पाखरांना आम्ही हुसकावतोय, शेतामधल्या कोंबड्या आजूबाजूला ‘पेस्ट मॅनेजमेंटचं’ काम करत आहेत...अमच्या कोंबड्याला दोन दिवसांपूर्वी खोकला झाला होता, त्यामुळे तो त्याच्या बसलेल्या आवाजात मध्येच आरवतोय! शेतामध्ये आमच्या मदतीला असलेले सगळे, शेतावर तयार झालेलं आमचं कंपोस्ट, झाडांमध्ये आणि भाज्यांमध्ये टाकत आहेत, आणि स्वप्नील – माझा नवरा, आमची धाकटी उनाड मुलगी (आमचे श्वान) हनीवा, कोणाच्यातरी हातून गेट उघड राहिलं होतं याचा फायदा घेऊन, आमच्या शेतातून पळून गेली आहे, आणि गावामध्ये जाऊन कुठेतरी लपून बसली आहे, तिला शोधायला गेला आहे. सध्या एवढंच. पुढच्या लेखात परत भेटूया!.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

गोष्ट एका ‘पेरणी’ची

Related Stories

Diwali on Farm: बांधावर व्हावी रोजच दिवाळी!

कमी पावसामुळे यंदा झेंडूची शेती कोमेजली

Women Farmers Success: नारी श्रमशक्ती शेतीत एकवटली! पंधरा महिलांनी १५ एकरांत पिकविले १९७ क्विंटल सोयाबीन

Nagpur Farmhouse Raid : नागपूरच्या 'ग्रीन फार्म'मध्ये डान्स बारच्या धर्तीवर अश्लील नृत्याचा धिंगाणा