Foods for Hemoglobin : शरीरात रक्ताची कमतरता जाणवतेय? मग, 'या' खाद्यपदार्थांच्या सेवनाने वाढवा हिमोग्लोबीनची पातळी

Foods for Hemoglobin : आपले आरोग्य निरोगी रहावे, यासाठी आपण अनेक प्रयत्न करतो. यासाठी नियमित व्यायाम आणि संतुलित आहार अतिशय गरजेचा आहे. जर या दोन्ही गोष्टींचा समतोल तुम्ही साधला तर तुमचे आरोग्य निरोगी राहील, यात काही शंका नाही. संतुलित आहारामध्ये अनेक घटकांचा समावेश करणे, महत्वाचे ठरते. जर आहार पौष्टिक नसेल तर मग आरोग्याच्या अनेक समस्या निर्माण होतात.

अनेक महिला आणि लहान मुलांमध्ये खास करून हिमोग्लोबीनची कमतरता आढळून येते. आपल्या शरीरातील ऑक्सिजन हा एका ठिकाणाहून दुसऱ्या ठिकाणी पोहचवण्याचे काम लाल रक्तपेशी करतात. या लाल रक्तपेशींमध्ये हिमोग्लोबीन नावाचे प्रथिने आढळते. या हिमोग्लोबीनमुळे शरीरात ऑक्सिजनची ने –आण करणे सुलभ होते.

जेव्हा शरीरात हिमोग्लोबीनची कमतरता निर्माण होते, तेव्हा अशक्तपणा, थकवा जाणवतो. यासोबतच इतर अनेक समस्या उद्भवू शकतात. ही हिमोग्लोबीनची कमतरता भरून काढण्यासाठी तुम्ही आहारात काही खाद्यपदार्थांचा समावेश करणे फायद्याचे ठरते. कोणते आहेत हे खाद्यपदार्थ? चला तर मग जाणून घेऊयात.

डाळिंब

डाळिंब हे फळ आपल्या आरोग्यासाठी अतिशय लाभदायी आहे. डाळिंबामध्ये अनेक पोषकघटक आढळून येतात. त्यामुळे, या फळाचा आहारात जरूर समावेश करावा. अनेक जण असे म्हणतात की, डाळिंबाचा रंग लाल असल्यामुळे त्याचे सेवन केल्याने शरीरातील रक्त वाढते. हे अगदी खरे आहे.

डाळिंब खाल्ल्याने शरीरात हिमोग्लोबीनची पातळी वाढण्यास मदत होते. डाळिंबामध्ये लोह, कॅल्शिअम आणि व्हॅटिमिन्सचे भरपूर प्रमाण आढळते. त्यामुळे, या फळाचे अवश्य सेवन करा.

केळी

अनेकांना केळी खायला आवडतात. केळ्यामध्ये भरपूर प्रमाणात विविध पोषकघटकांचा समावेश आढळून येतो. खास करून प्रथिने, लोह आणि कॅल्शिअमचा प्रमुख स्त्रोत म्हणून ही केळीला ओळखले जाते. केळी खाल्ल्याने आपल्या शरीराला ऊर्जा मिळते.

केळ्यामध्ये लोह आणि फॉलेट मोठ्या प्रमाणात आढळते. हे दोन्ही घटक हिमोग्लोबीन तयार करण्यासाठी आवश्यक असतात. त्यामुळे, जेव्हा तुम्हाला अशक्तपणा, थकवा जाणवेल तेव्हा केळ्याचे जरूर सेवन करा. यामुळे, हिमोग्लोबीनची कमतरता भरून निघण्यास मदत होईल.

पालक

आरोग्यासाठी फायदेशीर असणारी ही हिरवी पालेभाजी अनेकांच्या आहाराचा प्रमुख भाग आहे. पालकचे सेवन आवर्जून केले जाते. या हिरव्या पालेभाजीमध्ये लोह आणि फॉलेट्स भरपूर आढळतात. जे हिमोग्लोबीन तयार करण्यासाठी आवश्यक असतात. त्यामुळे, पालकचे सेवन केल्याने हिमोग्लोबीनची पातळी वाढण्यास मदत होते. तुमच्या आहारात पालकचा अवश्य समावेश करा.