Keratin Hair Treatment : केराटिन ट्रीटमेंटनंतर केसगळती वाढलीय? मग, फॉलो करा 'या' टिप्स

Keratin Hair Treatment : आजकाल केसांवर विविध प्रकारच्या ट्रीटमेंट्स केल्या जातात. जगभरातील महिलांचा हेअर ट्रीटमेंट करण्यावर मोठ्या प्रमाणात भर दिसून येतोय. चमकदार आणि स्मूथ केसांसाठी तरूणी या ट्रीटमेंट्सवर हजारो पैसे खर्च करतात. केराटिन, स्मूथनिंग आणि स्ट्रेटनिंगसारख्या केसांच्या ट्रीटमेंट्सचा जणू आता ट्रेंडच आला आहे. या ट्रीटमेंटची मागणी देखील दिवसेंदिवस वाढताना दिसत आहे.

खर तर या ट्रीटमेंट केल्यानंतर काही काळ तुमचे केस सरळ, चमकदार आणि दाट दिसतात. मात्र, दीर्घकाळापर्यंत तुम्हाला याचे अनेक दुष्परिणाम देखील दिसू शकतात. या दुष्परिणामांपैकी सर्वात सामान्य म्हणजे मोठ्या प्रमाणात केस गळती होण्याची समस्या होय.

केराटिन हेअर ट्रीटमेंट केल्यानंतर महिलांचे केस मोठ्या प्रमाणात गळतात. तुम्ही देखील या समस्येने त्रस्त असाल तर आज खास तुमच्यासाठी आम्ही काही टिप्स सांगणार आहोत. या टिप्स जर तुम्ही फॉलो केल्या तर तुम्हाला केसगळतीवर नियंत्रण मिळवता येईल.

ओल्या केसांवर ब्रश किंवा कंगवा फिरवू नका

केराटिन ट्रीटमेंट केलेल्या केसांची खास काळजी घेणे गरजेचे आहे. जर तुमचे केस ओले असतील तर त्यावर कोणत्याही ब्रश किंवा कंगव्याचा वापर करणे टाळा. यामुळे, केस अधिक तुटण्याची शक्यता असते.

कारण, केराटिन ट्रीटमेंट केल्यामुळे तुमचे केस पूर्वीपेक्षा नाजूक आणि कमकुवत झालेले असतात. त्यामुळे, अशा परिस्थितीमध्ये तुम्ही सर्वात आधी केस व्यवस्थित कोरडे करून घ्या. त्यानंतर, केसांवर कंगवा फिरवा. यामुळे, केस तुटण्याचे प्रमाण कमी होईल आणि केसगळती नियंत्रणात राहील.

हिटिंग टूल्स पूर्णपणे टाळा

केसांना स्टाईल करण्यासाठी वापरले जाणारे हिटिंग टूल्स जसे की, ब्लो ड्रायर, कर्लिंग, स्ट्रेटनर इत्यादी हिटिंग टूल्सचा केसांवर वापर करणे टाळा. यामुळे, तुमचे केस जास्त कोरडे होतील आणि तुटतील. त्यामुळे, या साधनांचा वारंवार वापर करणे पूर्णपणे टाळा. या हिटिंग टूल्सचा वापर केल्याने तुमचे केस अधिक कमकुवत होतात आणि केस मोठ्या प्रमाणात गळतात.

जेव्हा तुम्ही केसांवर केराटिन, स्मूथनिंग करता, तेव्हा केस जास्त गरम होण्याच्या प्रक्रियेतून जातात. ज्यामुळे, केसांचे अधिक नुकसान होते, अशा परिस्थितीमध्ये तुम्ही केराटिन ट्रीटमेंटनंतर केसांवर हिटिंग टूल्सचा वापर करू नये. जर हे तुम्ही फॉलो केले तर केसगळती नियंत्रणात येण्यास मदत होईल.