Almond Dates Ladoo Benefits मुलांना खजूर-बदामाचे लाडू खायला द्या, जाणून घ्या फायदे व रेसिपी

Almond Date Ladoo Recipe : सुकामेव्यामध्ये हेल्दी फॅट्सचे प्रमाण जास्त असते. सुकामेव्याचे सेवन केल्यास शरीरामध्ये ऊर्जा दीर्घकाळासाठी टिकून राहते. म्हणूनच प्रौढांप्रमाणेच लहान मुलांच्या आरोग्यासाठीही ड्रायफ्रुट्सचे सेवन करणे फायदेशीर असते. यातील पोषणतत्त्वांमुळे मुलांचे शरीर मजबूत होण्यास मदत मिळते.

बाळ वयाने लहान असेल तर त्यांचे दात येईपर्यंत ड्रायफ्रुट्स मिक्सरमध्ये वाटून खाऊ घालावे. तसंच सुकामेव्यांपासून स्वादिष्ट पदार्थही तयार करून आपण त्याचा लहान मुलांच्या डाएटमध्ये समावेश करू शकता. या लेखाद्वारे आपण बदाम आणि खजूर यापासून लाडू कसे तयार करायचे, याची रेसिपी जाणून घेऊया.

खजूर-बदामाच्या लाडूंची रेसिपी (How To Make Almond And Dates Ladoo In Marathi)

सामग्री 

• बदाम - एक चतुर्थांश कप 

• खजूर - 10 

• आवश्यकतेनुसार मनुके

• आवश्यकतेनुसार तूप

लाडू तयार करण्याची पद्धत

• सर्वप्रथम बदाम गरम तव्यावर भाजून घ्यावे. यानंतर बदाम थंड करत ठेवावे आणि त्यानंतर मिक्सरमध्ये वाटावे. 

• आता एका बाऊलमध्ये खजूर व मनुके एकत्रित करा आणि मॅश करा. 

• पॅन गरम करत ठेवा आणि त्यावर खजूर-मनुक्यांचे मिश्रण थोड्याशा तुपामध्ये परतून घ्यावे. 

• यानंतर गॅस बंद करावा व मिश्रण थंड होऊ द्यावे.

• हे मिश्रण आता बदामाच्या पावडरमध्ये मिक्स करावे.

• हे मिश्रण व्यवस्थित एकजीव करून घ्या आणि छोट्याछोट्या आकाराचे लाडू वळून घ्यावेत.

• लाडू वळून झाल्यानंतर एका डब्यात भरून ठेवा आणि एकदिवसाआड आपल्या मुलांना लाडू खाऊ घालावा.

खजूर आणि बदामाच्या लाडूचे फायदे ( Benefits of Almond And Dates Ladoo)

•  खजूर आणि बदामामध्ये शरीरास आवश्यक असणारे व्हिटॅमिन, खनिजे, लोह, अँटी-ऑक्सिडंट्स, फायबर यासारख्या पोषणतत्त्वांचा साठा मोठ्या प्रमाणात आहे. हे घटक लहान मुलांच्या शारीरिक विकासाकरिता लाभदायक आहेत. 

• शरीरातील रक्ताचे प्रमाण वाढण्यास मदत मिळते. 

• मेंदूच्या विकासाकरिता आवश्यक असणारे पोषक घटक खजूर व बदामामध्ये असतात. यामुळे डाएटमध्ये या सुकामेव्याचा समावेश करावा. 

• बदाम आणि मनुक्यामध्ये कॅल्शिअम, मॅग्नेशिअम, व्हिटॅमिन ई आणि ओमेगा - 3 फॅटी अॅसिड हे गुणधर्म असतात, ज्यामुळे शरीराची हाडे मजबूत होण्यास मदत मिळते. 

 डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.