'कडकनाथ'चे बुडवलेले बाराशे कोटी आधी शेतकऱ्यांना द्या; सदाभाऊंचे भाषण सुरू असतानाच भर सभेत युवकाचा सवाल

जयसिंगपूर : ‘‘कडकनाथ’चे (Kadaknath Chicken) बुडवलेले बाराशे कोटी आधी शेतकऱ्यांना द्या,’ असा थेट सवाल माजी मंत्री सदाभाऊ खोत (Sadabhau Khot) यांना उदगाव (ता. शिरोळ) येथे संदीप भंडारे या युवकाने विचारला. श्री. खोत यांचे भाषण सुरू असतानाच भर सभेत हा प्रकार घडल्याने व्यासपीठावरील मान्यवरांची तारांबळ उडाली.

मात्र श्री. खोत यांनी प्रसंगावधान राखत ही विरोधकांची खेळी असल्याचे सांगत वेळ मारून नेली. माजी खासदार राजू शेट्टी (Raju Shetti) आणि स्वाभिमानी शेतकरी संघटनेची कर्मभूमी असणाऱ्या उदगाव येथे धैर्यशील माने यांच्या प्रचारार्थ सभेचे आयोजन करण्यात आले होते.

या वेळी माजी मंत्री सदाभाऊ खोत भाषणाला उभे राहिल्यानंतर उदगावमधील संदीप भंडारे याने श्री. खोत यांचे भाषण थांबवत ‘आधी ‘कडकनाथ’चे बोला, शेतकऱ्यांचे पैसे परत द्या’, असे सुनावले. यावर क्षणभर खोत यांची तारांबळ उडाली. मात्र त्यांनी ही विरोधकांची खेळी असल्याचे सांगत, ‘आपणाला नरेंद्र मोदी यांना पुन्हा पंतप्रधान बनवायचे आहे. अशा गोष्टींकडे दुर्लक्ष करून पुढे जाऊ,’ असे सांगत वेळ मारून नेली. या सभेतील हा प्रकार चर्चेचा विषय बनला आहे.