Loksabha Election 2024 : लोकसभेसाठी बिहारमध्ये ‘जेडीयू’चे उमेदवार जाहीर ; दोन विद्यमान खासदारांना डच्चू

पाटणा : बिहारचे मुख्यमंत्री नितीशकुमार यांच्या नेतृत्वाखालील ‘जेडीयू’ने रविवारी (ता. २४) लोकसभा निवडणुकीसाठी राज्यातील १६ जागांसाठी आपले उमेदवार जाहीर केले. यात दोन विद्यमान खासदारांचा पत्ता कापण्यात आला असून, काही दिवसांपूर्वी पक्षात प्रवेश केलेल्या दोन उमेदवारांना लोकसभेचे तिकीट जाहीर केले.

पक्षाचे राष्ट्रीय उपाध्यक्ष वशिष्ठ नारायण सिंह यांनी अनेक वरिष्ठ नेत्यांच्या उपस्थितीत लोकसभा निवडणुकीच्या उमेदवारांची घोषणा केली. ज्या जागांवर विद्यमान खासदार वगळण्यात आले आहेत, त्या सीमामढीच्या लोकसभा मतदारसंघात विधान परिषदेचे अध्यक्ष देवेशचंद्र ठाकूर हे ‘जेडीयू’चे उमेदवार असतील आणि सिवान येथील जागेवर विजयलक्ष्मी कुशवाह यांना रमेशसिंह यांच्यासह पक्षात प्रवेश केल्यावर लगेचच तिकीट मिळाले.

कुशवाह हे ‘एनडीए’चे मित्रपक्ष असलेल्या राष्ट्रीय लोक मोर्चाचे प्रदेशाध्यक्ष होते. पक्षाचे तिकीट मिळालेले आणखी एक दुसऱ्या पक्षातून आलेले उमेदवार म्हणजे लवली आनंद, ज्यांनी महिन्याच्या सुरवातीला ‘जेडीयू’मध्ये सामील होण्यासाठी आरजेडी पक्ष सोडला होता. त्या शेओहरमधून निवडणूक लढवणार आहेत.