Loksabha Election : रोजगारासंदर्भात आमूलाग्र कृती करू ; राहुल यांचे आश्‍वासन,लोकशाहीला धक्के बसत असल्याचा आरोप

तिरुनेलवेल्ली (तमिळनाडू) : ‘‘देशात काँग्रेसचे सरकार सत्तेवर आल्यास रोजगार उपलब्ध करून देण्यासाठी आमूलाग्र कृती केली जाईल. युवकांना प्रशिक्षण कालावधी उपलब्ध करून देऊ आणि सरकारी नोकऱ्यांमधील ३० लाख रिक्त जागाही भरू,’’ असे आश्‍वासन काँग्रेसचे नेते राहुल गांधी यांनी तमिळनाडूमध्ये एका प्रचारसभेत बोलताना दिले.

लोकसभेची निवडणूक जाहीर झाल्यानंतर राहुल गांधी यांची तमिळनाडूमध्ये आज पहिलीच सभा झाली. यावेळी भाजपवर टीका करताना राहुल गांधी म्हणाले,‘‘पुन्हा सत्तेत आल्यास राज्यघटना बदलून टाकू, असे भाजपचे नेते उघडपणे सांगत आहेत. सर्व जग आधी भारताकडे लोकशाहीचा आधारस्तंभ म्हणून पहात होते, आता भारतात लोकशाही राहिली नाही असे अनेकांचे मत बनले आहे. मोदींना देशातील अर्थ यंत्रणा आणि दूरसंचार यंत्रणा आपल्या ताब्यात ठेवायच्या आहेत. बेरोजगारीसारखे मुद्द्यांवर चर्चाच केली जात नाही.

देशात ‘इंडिया’ आघाडीचे सरकार आल्यास युवकांना रोजगार देण्यासाठी आमूलाग्र आणि ठोस कृती केली जाईल. आम्ही पदवी आणि पदविकाधारक युवकांना प्रशिक्षण कालावधी उपलब्ध करून देऊ. त्यासाठी संसदेत कायदाही करू. सरकारी नोकऱ्यांमध्ये असलेल्या सुमारे ३० लाख जागांवरही भरती करू.’’

विचारांची लढाई

सध्या देशात विचारांची लढाई सुरू असल्याचा दावा राहुल गांधी यांनी केला. ते म्हणाले,‘‘एका बाजूला सामाजिक न्याय, स्वातंत्र्य, समानता अशा विचारांना महत्त्व देणाऱ्या पेरियार ई. व्ही. रामास्वामी यांची विचारधारा आहे, तर दुसऱ्या बाजूला रा. स्व. संघ आणि पंतप्रधान मोदींची विचारधारा आहे. मोदींना एक देश, एक नेता आणि एक भाषा असे धोरण राबवायचे आहे.’’ तमिळनाडूची संस्कृती, भाषा आणि इतिहास हे सर्वांत मोठे शिक्षक आहेत, असेही राहुल म्हणाले. पेरियार यांच्याबरोबरच सी. एन. अण्णादुराई, कामराज आणि एम. करुणानिधी यांनी सामाजिक न्यायाच्या मार्गाने कसे चालायचे हे देशाला दाखवून दिले, असेही प्रतिपादन राहुल यांनी केले.