Satara Lok Sabha : 'मविआ'च्या उमेदवारीचा कऱ्हाडच राहणार केंद्रबिंदू; कोणाला मिळणार उमेदवारी? उत्सुकता शिगेला

कऱ्हाड : लोकसभेसाठी (Satara Lok Sabha) अद्याप महायुती व महाआघाडीचे उमेदवार निश्‍चित झालेले नाहीत. त्यामुळे राजकीय पक्षांसह मतदारांत संभ्रमाचे वातावरण आहे. श्रीनिवास पाटील (Shrinivas Patil) यांच्या रूपाने महाआघाडीचा उमेदवार कऱ्हाडचा असेल, असे चित्र होते. मात्र, श्री. पाटील यांनी उमेदवारीतून माघार घेतल्याने महाआघाडीची उमेदवारी कोणत्या तालुक्याला मिळणार? याची उत्सुकता आहे.

त्यातच राष्ट्रवादीचे (शरद पवार गट) प्रदेशाध्यक्ष जयंत पाटील यांनी काल माजी मुख्यमंत्री पृथ्वीराज चव्हाण (Prithviraj Chavan) यांची भेट घेतल्याने पुन्हा चर्चेला ऊत आला आहे. या भेटीमुळे महाआघाडीच्या उमेदवारीचा केंद्रबिंदू कऱ्हाडच राहणार असल्याचे स्पष्ट होत आहे. लोकसभा मतदारसंघाचे २००९ मधील पुनर्रचनेत कऱ्हाडचा मतदारसंघ गायब झाला. कऱ्हाडचा समावेश सातारा मतदारसंघात झाला. त्यामुळे २००९ ते २०१९ या दहा वर्षांच्या काळात लोकसभेत कऱ्हाडला प्रतिनिधित्वच मिळाले नव्हते.

मात्र, २०१९ मध्ये झालेल्या लोकसभेच्या पेाटनिवडणुकीत श्रीनिवास पाटील यांच्या विजयामुळे दहा वर्षांच्या प्रतीक्षेनंतर पुन्हा प्रतिनिधित्व मिळाले. सातारा लोकसभा मतदारसंघात कऱ्हाड दक्षिण, कऱ्हाड उत्तर व पाटण विधानसभा मतदार संघ निर्णायक ठरणारे आहेत. त्यामुळे कऱ्हाडला विशेष महत्त्व आहे. राजकीय नेत्यांनीही हे महत्त्व जाणले आहे. म्हणूनच सातारा, वाई, कोरेगाव विधानसभा मतदारसंघातील प्रतिस्पर्धी उमेदवार असेल तर कऱ्हाडचा उमेदवारच प्रखरपणे लढत देऊ शकेल, असे गणित बनले आहे.

त्यामुळेच खासदार श्रीनिवास पाटील यांच्या माघारीनंतर महाआघाडीने तुल्यबळ लढत देऊ शकणारे उमेदवार म्हणून काँग्रेसचे नेते माजी मुख्यमंत्री आमदार पृथ्वीराज चव्हाण यांचे नाव पुढे आले आहे. त्यामुळे आमदार चव्हाण उमेदवार असल्यास त्यांचे चिन्ह हात असणार की तुतारी? हे लवकरच स्पष्ट होईल. मात्र, महायुतीच्या उमेदवारीचा केंद्रबिंदू हा कऱ्हाडच असल्याचे स्पष्ट होत आहे.

...तर रंगतदार लढत

महाआघाडीने आमदार चव्हाण यांना उमेदवारी दिल्यास त्यांच्याविरोधात महायुतीचे उमेदवार म्हणून उदयनराजे भोसले असणार की आणखी कोण? याची उत्सुकता आहे. महायुतीनेही कऱ्हाडमध्येच उमेदवारी दिल्यास निवडणूक रंगतदार होणार, हे निश्‍चित.