Kolhapur Lok Sabha : शाहू महाराजांविरोधात निवडणूक लढवणारे काँग्रेसचे बंडखोर नेते बाजीराव खाडे 6 वर्षांसाठी निलंबित

कोल्हापूर : कोल्हापूर लोकसभा (Kolhapur Lok Sabha) मतदारसंघातून अपक्ष अर्ज दाखल केलेले काँग्रेसचे (Congress) राष्ट्रीय सचिव बाजीराव खाडे (Bajirao Khade) यांच्या बंडखोरीची गंभीर दखल घेत प्रदेशाध्यक्ष नाना पटोले यांच्या आदेशानुसार खाडे यांना पक्षातून सहा वर्षांसाठी निलंबित करण्यात आले. पक्षाचे प्रदेश उपाध्यक्ष नाना गावंडे यांनी हे आदेश काढले.

बाजीराव खाडे हे कोल्हापूर लोकसभा मतदारसंघातून पक्षाकडून लढण्यास इच्छुक होते. त्याचाच एक भाग म्हणून गेली दोन वर्षांहून अधिक काळ त्यांनी मतदारसंघात संपर्क अभियान राबवले होते. कोल्हापूरची जागा काँग्रेसला मिळाल्यानंतर पक्षाने याठिकाणी श्रीमंत शाहू छत्रपती महाराज (Shahu Chhatrapati Maharaj) यांना उमेदवारी दिली.

त्यातून नाराज झालेल्या खाडे यांनी अपक्ष अर्ज भरत बंडखोरी केली. त्यांची समजूत काढण्याचा प्रयत्न स्थानिक पातळीवर झाला, पण त्याला खाडे यांनी दाद दिली नाही. खाडे यांनी केलेल्या या बंडखोरीची गंभीर दखल घेत पक्षाने त्यांना सहा वर्षांसाठी पक्षातून निलंबित करण्याचे आदेश आज काढले.