Loksabha 2019 : दिग्गज प्रचारक मैदानात

Leader
Leader

शरद पवार, फडणवीस, आंबेडकर, आदित्य ठाकरे, ओवेसी यांच्या सभा
पिंपरी - माजी उपमुख्यमंत्री अजित पवार यांचे चिरंजीव पार्थ आणि शिवसेनेचे श्रीरंग बारणे यांच्यामध्ये होणारी मावळ लोकसभा मतदारसंघातील निवडणूक प्रतिष्ठेची बनली आहे. 

मतदारांपर्यंत पोचण्यासाठी निवडणुकीच्या अखेरच्या टप्प्यात बारणे यांच्या प्रचारासाठी २४ एप्रिल रोजी आदित्य ठाकरे यांची, तर २५ एप्रिलला उद्धव ठाकरे यांच्या तोफा चिंचवडमध्ये धडाडणार आहेत. पार्थ पवार यांच्या प्रचारासाठी राष्ट्रवादी काँग्रेसचे अध्यक्ष शरद पवार, माजी उपमुख्यमंत्री अजित पवार यांच्याबरोबरच शेकापचे आमदार जयंत पाटील आणि काँग्रेसचे स्टार प्रचारक मैदानात उतरले आहेत. वंचित बहुजन आघाडीचे उमेदवार राजाराम पाटील यांच्या प्रचारासाठी प्रकाश आंबेडकर आणि असदुद्दीन ओवेसी यांची सभा या निवडणुकीचे आकर्षण ठरणार आहे. उमेदवारी अर्ज मागे घेण्यासाठी शुक्रवार (ता. १२ ) अखेरचा दिवस आहे. 

भाजपचे केंद्रीय मंत्री प्रचाराला
केंद्रातील मंत्री प्रचारासाठी मावळ मतदारसंघात येणार आहेत. सध्या केंद्रातील मंत्री या भागातील भाजप-शिवसेनेच्या उमेदवारांचा प्रचार करण्यात व्यग्र आहेत. १९ ते २७ एप्रिलदरम्यान ते मावळ मतदारसंघात प्रचारासाठी येणार असून, सभांबरोबरच प्रचार फेऱ्या, मेळावे यांचे आयोजन करण्यात येणार आहे. पनवेलमध्ये मुख्यमंत्री देवेंद्र फडणवीस यांच्या सभेचे नियोजन करण्यात येणार असून, त्याची तारीख लवकरच जाहीर होणार आहे. आमदार लक्ष्मण जगताप आणि श्रीरंग बारणे यांच्यामध्ये मनोमीलन झाल्यामुळे शहरात भारतीय जनता पक्षाचे कार्यकर्ते बारणे यांच्या प्रचाराच्या कामाला लागले आहेत.  पार्थ पवार यांच्या प्रचारासाठी शनिवारी (ता. १३) साताऱ्याचे खासदार उदयनराजे भोसले आणि आमदार शिवेंद्रराजे भोसले यांच्या सभेचे आयोजन करण्यात आले आहे. पुढील आठवड्यात शरद पवार यांच्या सभा शहरात होणार आहेत. दरम्यान, मनसेचे अध्यक्ष राज ठाकरे यांच्या सभेचे शहरात आयोजन करण्याच्या हालचाली सुरू आहेत.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com