दरमहा १००० सोलापूरकर परदेशवारीच्या प्रेमात! पडताळणीनंतर १५ दिवसांत मिळते प्रमाणपत्र; पोलिस कशी करतात पडताळणी? वाचा...

तात्या लांडगे

सोलापूर : सोलापूर शहरातील सरासरी एक हजार तरुण-तरुणी व अन्य व्यक्ती दरमहा पासपोर्टसाठी पोलिस आयुक्तालयाकडे अर्ज करत आहेत. त्या अर्जदाराची संबंधित पोलिस ठाण्याकडून पडताळणी होऊन त्यांना नियमानुसार सात ते १५ दिवसांत त्याचे प्रमाणपत्र दिले जाते. मागील पाच वर्षांच्या तुलनेत दोन वर्षांत पासपोर्टसाठी अर्ज करणाऱ्यांचे प्रमाण दुपटीने वाढल्याचे शहर पोलिसांनी सांगितले.

परदेशात जाण्यासाठी इच्छुक सोलापूरकरांची संख्या दिवसेंदिवस वाढू लागली आहे. त्यामुळे पासपोर्ट काढण्यासाठी मागील सात महिन्यात सोलापूर शहरातील सात हजारांहून अधिक जणांनी अर्ज करून पासपोर्टची मागणी केली आहे. परदेश प्रवास हा पूर्वीपेक्षा आता आर्थिकदृष्ट्या किफायतशीर झाला आहे. तसेच पासपोर्ट देण्याची किचकट प्रक्रिया देखील सुलभ झाली आहे. त्यामुळे शिक्षण, नोकरी, व्यवसायाच्या निमित्ताने देश-विदेशात जाणाऱ्या सोलापूरकरांची संख्या वाढत आहे.

सोलापुरातील अभियंते, खेळाडू, डॉक्टर नोकरीसाठी नेहमीच परदेशवारी करतात. याशिवाय शिक्षणाच्या निमित्ताने देखील सोलापुरातील शेकडो तरुण-तरुणी परदेशात आहेत. त्यांना भेटण्यासाठी त्यांचे पालक, नातेवाईक जातात. त्यामुळे ते देखील पासपोर्ट काढत असल्याचे पोलिसांनी सांगितले.

सोलापूरहून विमानसेवा सुरू झाल्याचा आनंद

पहिल्या टप्प्यात आता सोलापूर-गोवा विमानसेवा सुरू झाली असून त्याचा प्रतिसादही चांगला आहे. आगामी काळात सोलापूर- मुंबई, सोलापूर-तिरूपती या मार्गावरही विमानसेवा सुरू करण्याच्या हालचाली सुरू आहेत. त्यामुळे परदेशात जाण्याचा सोलापूरकरांचा मार्ग सोपा झाला आहे. आगामी काळात बोरामणी येथील १२०० एकरावर आंतरराष्ट्रीय विमानतळही प्रस्तावित आहे. सध्याच्या होटगी रोड विमानतळावरून नाईट लॅण्डिंग शक्य नसल्याने बोरामणी विमानतळाचा विचार केला जात असून जिल्हाधिकाऱ्यांनी तसे स्पष्ट केले आहे. त्यामुळे परदेशवारीसाठी इच्छुक सोलापूकरांची संख्या वाढत आहे.

ठळक बाबी...

• शाळेच्या दाखल्यावरून अर्जदार त्याच शाळेत शिकत होता का?, याची पडताळणी होते

• आधार कार्ड किंवा अन्य कागदपत्रांवरील पत्त्यावर तो अर्जदार रहायला आहे का?, याचीही चौकशी होते

• अर्जदारांविरुद्ध कोठे पोलिसांत गुन्हा दाखल आहे का?, याचीही पडताळणी होते

• अर्जदाराने पासपोर्टसाठी जोडलेली कागदपत्रे खरी आहेत का?, याची खात्री केली जाते

• संबंधित पोलिस ठाण्याचे अंमलदार अर्जदाराच्या घरी जाऊन चौकशी करतात, त्यानंतर ७ ते १५ दिवसांत प्रमाणपत्र दिले जाते

७ ते १४ दिवसांत मिळतो दाखला

सोलापूर शहरातून मागील सात महिन्यांत पासपोर्टसाठी दरमहा सरासरी एक हजार तर चारित्र्य पडताळणीसाठी एक हजार ते चौदाशे अर्ज दाखल होत आहेत. अर्जाची प्रक्रिया ऑनलाइन आहे. अर्ज प्राप्त झाल्यावर त्या-त्या पोलिस ठाण्याकडून पडताळणी होते आणि ७ ते १४ दिवसात संबंधितास प्रमाणपत्र तथा दाखला दिला जातो.

- वैष्णवी पाटील, वरिष्ठ पोलिस निरीक्षक, विशेष शाखा, सोलापूर शहर