Ajit Pawar : चाळीस आमदारांना खूष करायला वाट्टेल ते सुरु आहे

बारामती - केवळ चाळीस आमदारांना खुष ठेवण्यासाठी आज राज्यकर्ते वाट्टेल ते करीत आहेत, त्यांनी मागणी केलेल्या कामांना पंचवीस पंधराची कामे, तीस चोपन्नची कामे मंजूर केली जात आहेत, अधिकारी सांगतात याला निधी नाही, अर्थसंकल्पात तरतूद नाही, तरीही ही कामे मंजूर करायचा धडाकाच सुरु आहे कारण तो आमदार नाराज होता कामा नये....अशा शब्दात विरोधी पक्षनेते अजित पवार यांनी सरकार आर्थिक शिस्त पाळत नसल्याचा घणाघाती आरोप केला. बारामतीत एका कार्यक्रमात बोलताना अजित पवारांनी ही टीका केली.

अजित पवार म्हणाले, मीही अनेक वर्षे अर्थमंत्री म्हणून काम केले आहे, बँकींग क्षेत्राशी माझा निकटचा संबंध आहे, आर्थिक शिस्त ही पाळावीच लागते, पण सरकार आमदार नाराज झाले तर वरिष्ठांच्या खुर्चीवर त्याचा परिणाम होईल या भीतीपोटी शिस्त पाळत नाही. याचा फटका सर्वांनाच सहन करावा लागत आहे. किती जणांना कामे केल्यानंतर बिले मिळणार आहेत या बद्दल मी स्वताः साशंक आहे, कामे मिळविण्यासाठी वेडेवाकडे प्रकार घडतात, दलाल फिरत आहेत, बदल्यांमध्येही तोच घोळ सुरु आहे. राज्याचे पुढे काय होणार याबद्दल राज्यकर्त्यांना काही देणे घेणे नाही.

सहाशे रुपये दराने वाळूचा मुद्दा मध्येच काढला गेला. ब्रम्हदेव आला तरी आता या दराने वाळू मिळू शकत नाही हे मलाही समजते आहे. महागाई वाढते आहे, राज्य कर्जबाजारी होत चालले आहे, या बाबतचे नियोजनच ढासळले आहे. मध्यंतरी मला काही अधिका-यांनी सांगितले, अर्थसंकल्पात जितकी तरतूद आहे त्यांच्या दहा पट जास्तीची कामे काढली जात आहेत.

दहा वर्ष बिले मिळणार नाहीत अशी स्थिती आहे. निवडणूकीपुरती वेळ मारुन नेण्याचा विचार करणारे राज्यकर्ते राज्यात आहेत, त्याची जबरदस्त किंमत राज्याला मोजावी लागत आहे.

महागाई, बेरोजगारी व राज्याच्या महत्वाच्या विषयांवर चर्चा व्हायला हवी, ती होत नाही ही बाब योग्य नाही. हे काय म्हणाले त्याच्यावर तुमची काय प्रतिक्रीया हेच सुरु राहते.