Maratha Reservation : ''मला मंत्रिपदाचं अप्रूप नाही, मी ओबीसींसाठी...'', छगन भुजबळ आता थेटच बोलले

राज्यात मराठा आरक्षणाचा मुद्दा मागील काही दिवसांपासून पेटलेला आहे. २० जानेवारी रोजी मराठा समाजाकडून मु्ंबई येथे आंदोलन केलं जाणार असून लाखोंच्या संख्येने नागरिक यामध्ये सहभागी होण्याची शक्यता आहे. दरम्यान मनोज जरांगे यांना राष्ट्रवादीचे नेते मंत्री छगन भुजबळ यांच्याकडून विरोध केला जात आहे. तसेच सरसकट मराठा समाजाला ओबीसी मध्ये आरक्षण देणे अशक्य असून याच्या विरोधात रस्त्यावर आणि न्यायालयात लढू असे भुजबळ म्हणाले आहेत.

राज्याचे मुख्यमंत्री एकनाथ शिंदे यांनी ओबीसी समाजाच्या आरक्षणाला धक्का न लावता मराठ्यांना आरक्षण दिलं जाईल असे म्हटले आहे. मात्र तरी देखील ओबीसी समाजाकडून होत असलेल्या आंदोलनाबाबत भुजबळांना प्रश्न विचारण्यात आला. तुम्ही मंत्री असून देखील तुमचा सरकारवर विश्वास नाही का? असा प्रश्न त्यांना विचारला असता भुजबळ म्हणाले की, मी मंत्री नंतर आहे, पहिल्यांदा माणूस आहे, तोही ओबीसीचा कार्यकर्ता पहिलं आहे. मी आमदार मंत्री नंतर... शिवसेना देखील ओबीसीच्या मंडल आयोगासाठी सोडली. त्या मंत्रिपदाचं, आमदारकी-खासदारकीचं मला कौतुक आणि अप्रूप देखील नाहीये. मी ओबीसीसाठी काम करतोय. त्यांना धक्का लागू नये. देशात ५४ टक्के लोक आहेत, त्यांच्यासाठी काम करतोय.

कशाला मोर्चा-आंदोलन करताय असं विचारत असाल तर पलिकडच्यांना पण तसं विचारा, जर ते धक्का न लावाता मराठा समाजाला देणार आहोत तर मग ते मुंबईला कशाला जात आहेत असेही भुजबळ यावेळी म्हणाले. सरसकट ओबीसी मधून मराठा समाजाला आरक्षण आम्ही होऊ देणार नाही... रस्त्यावरची आणि सगळीकडची लढाई आम्ही लढू असेही भुजबळ म्हणाले.

मराठा आरक्षणाच्या मागणीसाठी मराठा आंदोलक मनोज जरंगे पाटील हे २० जानेवारी रोजी सकाळी ९ वाजता त्यांच्या जालना जिल्ह्यातील अंतरवली सराटी या गावातून पायी मुंबईकडे रवाना होणार आहेत. ते अहमदनगर-पुणे मार्गे २६ जानेवारीपर्यंत मुंबईत पोहोचणार आहेत.