Vidhan Sabha 2019 : आता महायुतीच्या नेत्यांनी राजकीय वजन दाखवावे : मुख्यमंत्री

धुळे : विकासाच्या विविध योजनांमध्ये युती सरकारने भरीव कामगिरी केली. धुळे जिल्ह्यासह महाराष्ट्रात महायुतीचे सर्वच उमेदवार निवडून आणण्याची जबाबदारी त्या-त्या क्षेत्रातील महायुतीच्या नेत्यांकडे आहे. ही जबाबदारी त्यांनी यशस्वीपणे पार पाडून आपले राजकीय वजन दाखवावे, असे मुख्यमंत्री देवेंद्र फडणवीस यांनी सांगितले.

धुळे जिल्ह्यातील नेर तालुक्यात आज (बुधवार) मुख्यमंत्री देवेंद्र फडणवीस यांची सभा झाली. या सभेत त्यांनी काँग्रेस-राष्ट्रवादी आघाडीवर जोरदार टीका केली.

मुख्यमंत्री म्हणाले, ''विकासाला खरी दिशा पंतप्रधान मोदींनी दिली आहे. ते महाराष्ट्रासह देशात सर्वांगीण विकास साधण्यासाठी कटिबद्ध आहेत. अमेरिकेतील दौऱ्यावेळी तेथील अध्यक्ष डोनाल्ड ट्रम्प आणि त्यांचे मंत्रिमंडळ यांनी दीड तास मोदींचे भाषण हजारो जनतेच्या साक्षीने ऐकले. त्यानंतर प्रभावित होऊन अमेरिकेच्या अध्यक्षांनी मोदी है वैश्विक नेते असल्याचे जाहीर केले. त्यामुळे भारताला महासत्ता होण्यापासून आता कोणी आडवू शकत नाही. ते फक्त मोदींमुळेच शक्य होणार आहे. महाराष्ट्रात 50 लाख शेतकऱ्यांना कर्जमाफी दिली असून, शेवटच्या पात्र शेतकऱ्याला जोपर्यंत लाभ दिला जात नाही. तोपर्यंत कर्जमाफी योजना बंद केली जाणार नाही. आघाडी सरकारने सिंचनातून आपल्या तिजोरी भरल्या. पण, युती सरकारने जलयुक्त शिवार अभियानासह वेगवेगळ्या सिंचन योजनातून आणि केंद्रातून निधी मिळवून प्रकल्प पूर्णत्वाच्या माध्यमातून राज्यातील सिंचन प्रकल्प पूर्ण करण्यासाठी काम केले.''

महाराष्ट्रासह देशातील इतर राज्यात होत असलेल्या विधानसभा निवडणुकीत काँग्रेस आघाडीची वाटचाल पराभवाकडे होत आहे. पराभवाचे खापर आपल्या माथी फुटू नये म्हणून काँग्रेस नेते राहुल गांधी बँकॉकला निघून गेले आहेत. काँग्रेस-राष्ट्रवादी काँग्रेसच्या 50 वर्षांतील सरकारच्या काळात जनतेशी खोटारडेपणा केला आहे, अशी टीका फडणवीस यांनी केली आहे.