Whale Fish Death : तब्बल 42 तास प्रयत्न करून वाचवलेल्या 'त्या' व्हेल माशाचा कसा झाला मृत्यू? मोठं कारण आलं समोर..

रत्नागिरी : गणपतीपुळे समुद्र (Ganpatipule Sea) किनाऱ्यावर वाचविण्याचे प्रयत्न करून समुद्रात लोटलेला व्हेल मासा बुधवारी मृतावस्थेत गणपतीपुळे मालगुंड खाडीकिनारी लागला. ओहोटीनंतर गुरुवारी दुपारी गोव्यातील एजन्सीकडून माशाचे (Whale Fish) शवविच्छेदन करण्यात आले. त्याचा व्हिसेरा राखून ठेवला आहे.

व्हेलच्या मृत्यूचे कारण स्पष्ट झाले नसले तरी उपासमारीने मृत्यू झाला असा प्राथमिक अंदाज आहे. व्हेल माशाचे (ब्ल्यू व्हेल) ते पाच-सहा महिन्यांचे पिल्लू होते. तीस फूट लांब आणि सुमारे ४ टन त्याचे वजन होते. हे पिल्लू सोमवारी सकाळी गणपतीपुळे किनाऱ्यावर आले. शेकडो हातांनी तब्बल ४२ तास प्रयत्न करून त्याला जीवंत ठेवले.

ओहोटीच्यावेळी त्याच्यावर सातत्याने पाणी ओतण्यात आले. आठ तास सलाइन लावण्यात आले आणि ४२ तासांनी ते सुखरूप खोल समुद्रात गेले. परंतु काल सायंकाळी किनाऱ्यावर ते मृतावस्थेत दिसून आले. संध्याकाळी पाचच्या सुमारास हा मासा पुन्हा मृतावस्थेत किनाऱ्यावर लागला. पण, समुद्राला भरती असल्याने काहीच करता येत नव्हते.

या दरम्यान वन विभागाच्या रत्नागिरी परिक्षत्र वन अधिकारी राजेश्री कीर व त्यांच्या टीमने गोव्याच्या एजन्सीशी संपर्क साधला. सायंकाळी ही टीम घटनास्थळी दाखल झाली. ओहोटी असल्याने मृत व्हेल मासा किनाऱ्यावर दिसत होता. तिथेच या टीमद्वारे त्याचे शवविच्छेदन केले.