Dada Bhuse : बालकांच्या सुरक्षेसाठी निधीची तरतूद; चिराग ॲपचे केले अनावरण

मुंबई - बालकांच्या सुरक्षेच्या योजनांसाठी निधी कमी पडू देणार नाही. विद्यार्थ्यांच्या सुरक्षेसाठी शाळा परिसरात दामिनी पथक नेमणार असल्याचे शालेय शिक्षण मंत्री दादा भुसे यांनी सांगितले.

विधान परिषद उपसभापती डॉ. नीलम गोऱ्हे, महाराष्ट्र राज्य बाल हक्क संरक्षण आयोगाच्या अध्यक्षा सुशीबेन शाह यांच्या प्रमुख उपस्थितीत आयोगामार्फत ‘बालरक्षा मोहिमेचा’ प्रारंभ सह्याद्री अतिथिगृह येथे झाला. महाराष्ट्र राज्य बाल हक्क संरक्षण आयोगाच्या जनजागृतीपर भित्तिपत्रक अनावरण, बालरक्षा मोहीम प्रशिक्षण पुस्तिकेचे प्रकाशन, ‘चिराग ॲप’चे डिजिटल पद्धतीने अनावरण डॉ. गोऱ्हे आणि भुसे यांच्या हस्ते करण्यात आले.

बालकांच्या सुरक्षिततेच्या दृष्टीने उपाययोजनांची प्रभावी अंमलबजावणी करण्यात येत आहे. प्रत्येक शाळेत नेमण्यात आलेल्या पालक-शिक्षण समितीचे ऑनलाइन निगराणी करण्यात येणार आहे. मुलांच्या आत्महत्या थांबविण्यासाठी त्यांचे समुपदेशन समवयस्क मुलांमार्फत झाल्यास प्रभावी ठरेल, असा विश्वास उपसभापती डॉ. गोऱ्हे यांनी व्यक्त केला.

बालरक्षा मोहिमेनिमित्त उपक्रम

सुशीबेन शहा यांनी आयोगामार्फत फेब्रुवारी २०२५ ते मार्च २०२५ दरम्यान होणाऱ्या बालरक्षा मोहिमेबद्दल सविस्तर माहिती दिली. यामार्फत सुरक्षित व असुरक्षित स्पर्श, सखी सावित्री समिती या सरकारच्या नियमाची प्रभावी अंमलबजावणी, ‘पोक्सो’ अधिनियम २०१२ मधील तरतुदी, सायबर सुरक्षितता, शिक्षक-शाळांसाठी मार्गदर्शक सूचना, शालेय बसद्वारे नियमित वाहतूक तसेच शालेय सहलीनिमित्त घ्यावयाची दक्षता यानिमित्त परिसंवाद आयोजित करण्यात येणार आहे.

समस्या सोडविण्यास सहकार्य

भुसे म्हणाले, ‘लहान बालकांच्या समस्यांबाबत तक्रारी नोंदवायच्या असतील तर चिराग ॲपद्वारे नोंदवता येतील. या माध्यमातून ग्रामीण तसेच शहरी भागातील प्रत्येक शाळांमधील विद्यार्थ्यांच्या समस्या सोडवण्यासाठी सरकार आयोगास सर्वतोपरी सहकार्य करणार आहे. शिक्षकांनाही प्रशिक्षण देण्यात येईल. सखी सावित्री समितीचा विस्तार करण्यात येणार आहे. ‘पोक्सो’ कायद्यात अधिक कठोर तरतुदी करण्यात येणार असून यासाठी सामाजिक संस्थांशी समन्वय साधणार आहे.’