Kasba Bypoll Election : "कसबा, चिंचवड पोटनिवडणुकीत महाविकास आघाडी भाजपाला धूळ चारणार"

पुण्यातील कसबा आणि चिंचवड मतदारसंघातील विधानसभेच्या पोटनिवडणुकीने संपूर्ण राज्याचं लक्ष वेधून घेतलं आहे. ही पोटनिवडणूक बिनविरोधी करण्यासाठी भाजपचे अतोनात प्रयत्न सुरू आहेत. मात्र, महाविकास आघाडी पोटनिवडणूक लढण्यावर ठाम आहे. तर भाजपसोबत कसबा मतदारसंघात काँग्रेसही उमेदवारी अर्ज दाखल करणार असल्याचे आज नाना पटोले यांनी सांगितले आहे.

तर राष्ट्रवादी काँग्रेसही उमेदवार देण्याच्या भूमिकेवर ठाम आहे. या पोटनिवडणुकीच्या प्रचारासाठी जाणार असून, चिंचवड, कसबा पोटनिवडणुकीत भाजपचा पराभव होईल, असा दावा राष्ट्रवादी काँग्रेसचे ज्येष्ठ नेते एकनाथ खडसे यांनी केला आहे.

माध्यमांशी बोलताना एकनाथ खडसे म्हणाले की, २०१९ च्या निवडणुकीनंतर माझेच नाव मुख्यमंत्रीपदासाठी घेतले जात होते. मात्र त्याआधीच २०१६ रोजी मला राजीनामा द्यावा लागला. माझ्यावर खोटे आरोप करुन मला राजीनामा देण्यासाठी भाग पाडले गेले. माझ्याविरोधात घडवून षड्यंत्र रचल्याचा आरोपही एकनाथ खडसे यांनी केला आहे.

पुढे बोलताना खडसे म्हणाले की, 'कसबा आणि चिंचवड पोटनिवडणुकीत भाजपचा पराभव होणार आहे. पंढरपूर, कोल्हापूरची जागा बिनविरोध न करता भाजपाने त्यांचे उमेदवार उभे केले होते. त्यावेळी भाजपला बिनविरोधची आठवण झाली नाही. पुण्यात अनेक खानदेशी लोक राहतात, त्यामुळे या दोन्ही पोटनिवडणूक जागेसाठी आम्ही जळगावचे पदाधिकारी प्रचारासाठी जाणार आहोत. स्वतः चार ते पाच दिवस तिथे प्रचार करणार आहे'.