Failed Students : नापास विद्यार्थ्यांसाठी फेल्युअर पार्टी; आयुक्तांच्या उपक्रमाचं राज्यभर कौतुक

छत्रपती संभाजी नगरः जिल्ह्यातील नापास विद्यार्थ्यांसाठी फेल्युअर पार्टीचं आयोजन छत्रपती संभाजी नगरमध्ये करण्यात आलेलं आहे. आयुक्तांच्या या उपक्रमाचं राज्यभरात कौतुक होत आहे.

दहावी आणि बारावी हा विद्यार्थ्यांच्या आयुष्यातील एक महत्त्वाचा टप्पा असतो. या टप्प्यावर अपयश आलं तर ऐन उमेदीत पदरी नैराश्य येतं. त्यामुळे अंगभूत कौशल्यांवरही दुष्परिणाम होतो. या विद्यार्थ्यांना उभारी देण्याचं काम करणं आवश्यक असतं.

हाच विचार घेऊन छत्रपती संभाजी नगरचे महापालिका आयुक्त जी. श्रीकांत यांनी बारावी परीक्षेत नापास झालेल्या विद्यार्थ्यांसाठी एका पार्टीचं आयोजन केलेलं आहे. 'फेल्युअर पार्टी' असं नाव या पार्टीला देण्यात आलेलं आहे. येत्या ६ जून रोजी ही पार्टी संपन्न होणार आहे.

नापास झालेल्या विद्यार्थ्यांचे उच्च शिक्षण धोक्यात येऊन त्यांच्या स्किलवरही परिणाम होतो. त्यामुळे त्यांना या काळात मार्गदर्शन आणि नवीन उभारी मिळावी, यासाठी पाठीवर थाप मारून 'तू चाल पुढं तुला रं गड्या भिती कशाची' असा विश्वास निर्माण करण्याची गरज असते. म्हणूनच छत्रपती संभाजीनगर मनपा आयुक्त जी. श्रीकांत यांनी बारावीच्या परीक्षेत जिल्ह्यातील १३,८३६ नापास झालेले किंवा कमी गुण मिळालेल्या विद्यार्थ्यांसाठी फेल्युअर पार्टीचं आयोजन केलेलं आहे.

६ जून रोजी सकाळी १० वाजता सिडको एन-५ येथील लाइट हाऊस, धर्मवीर संभाजी शाळेच्या शेजारी फेल्युअर पार्टीचे आयोजन करण्यात आलेलं आहे. महापाविका आयुक्त जी. श्रीकांत यांच्या या उपक्रमाचं राज्यभरातून कौतुक होत आहे.