११ महिन्यात १३८८ विवाहितांची कौटुंबिक छळातून पोलिसांत धाव! सोलापूर शहरात ६३७ जोडप्यांचा तुटणारा संसार पोलिसांनी जोडला; पोलिसांकडून ‘नांदा सौख्य भरे’ उपक्रम

तात्या लांडगे

सोलापूर : सोलापूर शहरातील सात पोलिस ठाण्याअंतर्गत १ जानेवारी ते ३० नोव्हेंबर २०२५ या काळात एक हजार ३८८ महिलांनी कौटुंबिक छळावरुन पोलिसांत धाव घेतली. त्यातील ६३७ जणांचे समुपदेशन करुन पोलिसांनी त्यांचा तुटण्याच्या उंबरठ्यावरील संसार पुन्हा जोडला. सोमवारी (ता. २२) पोलिस आयुक्तालयातर्फे ‘नांदा सौख्य भरे’ उपक्रम घेतला. त्याअंतर्गत ३० जोडप्यांचा रोपटे देऊन पोलिस आयुक्त एम. राज कुमार यांनी सत्कार केला.

सोलापूर शहर पोलिस आयुक्तालयातील ‘भरोसा सेल’मध्ये महिला, ज्येष्ठ नागरिक व अन्य लोक कौटुंबिक छळाच्या तक्रारी घेऊन येतात. वरिष्ठ पोलिस निरीक्षक धनंजय शिंगाडे यांच्या नेतृत्वात दोन अधिकारी व १८ पोलिस अंमलदार तक्रारदार व ज्याच्याविरोधात तक्रार आहे, त्यांचे समुपदेशन करतात. त्यातून ११ महिन्यात सहाशेहून अधिक कुटुंबांतील वाद मिटविण्यात पोलिसांना यश मिळाले. समुपदेशनानंतरही ज्यांचा वाद मिटत नाही, त्याबद्दल पोलिसांत गुन्हा दाखल होतो. दरम्यान, समझोता झाल्यावर गैरसमज, वाद बाजूला सारुन पुन्हा नव्याने सुखाचा संसार करणाऱ्या ३० जोडप्यांना पोलिस आयुक्तालयात बोलावून त्यांचा सत्कार करण्यात आला.

यावेळी पोलिस आयुक्त एम. राज कुमार, उपायुक्त डॉ. अश्विनी पाटील, विजय कबाडे, सहायक पोलिस आयुक्त राजन माने, पोलिस निरीक्षक धनंजय शिंगाडे, स्नेहा म्हेतर, सहायक पोलिस निरीक्षक स्वाती येळे, उपनिरीक्षक महेश महामुनी, अंजली राठोड, लता राऊत, ताजुद्दिन शेख, निलम माळवे, सैफन पटेल, सुजाता यादवाड, कपिल पिरजादे, कविता डांगे, अंबिका सुरवसे, इंदिरा राठोड, शितल माने, सरस्वती घाडगे, नसिमा शेख यांची उपस्थिती होती.

कौटुंबिक छळाच्या तक्रारीची स्थिती

• ११ महिन्यांतील तक्रारी

• १,३८८

• पोलिसांकडून समझोता

• ६३७

• समुपदेशनासाठी अंमलदार

• २०